Italia po përgatitet të ndalojë mbulimin e fytyrës në shkolla dhe të vendosë një kufi për numrin e nxënësve të huaj në çdo klasë, deklaroi të dielën kryeministrja Giorgia Meloni, gjatë një aktiviteti rinor të organizuar nga partia e saj.
Italia është një nga vendet europiane më të ekspozuara ndaj mbërritjeve të migrantëve, për shkak të pozicionit të saj në Mesdheun qendror. Për këtë arsye, emigracioni mbetet një nga temat më të ndjeshme politike dhe një sfidë e vazhdueshme për qeveritë italiane.
Integrimi i emigrantëve, veçanërisht atyre që vijnë nga vende me shumicë myslimane, vazhdon të jetë çështje e debatueshme në politikën dhe shoqërinë italiane. Simbolet fetare, integrimi kulturor, rregullat e shtetësisë dhe politikat e emigracionit janë tema që shpesh ndajnë opinionin publik.
“Shumë shpejt do të paraqitet në mbledhjen e Këshillit të Ministrave një masë që përcakton me ligj numrin maksimal të nxënësve të huaj në një klasë. Ajo do të kërkojë gjithashtu që prindërit e nxënësve të huaj, të cilët kanë vështirësi serioze integrimi në sistemin shkollor, të mësojnë italisht, si dhe do të ndalojë burkat dhe nikabet në shkolla”, tha Meloni në takimin vjetor të të rinjve të partisë së saj, “Fratelli d’Italia”.
Sipas Melonit, kur në një klasë ka vetëm një fëmijë që nuk kupton italisht, ai mund ta mësojë gjuhën dhe të integrohet shpejt me ndihmën e shokëve dhe mësuesve. Por, sipas saj, kur numri i fëmijëve që nuk kuptojnë gjuhën bëhet i madh, apo edhe shumicë, “kjo nuk është më integrim, por braktisje”.
Kryeministrja italiane nuk dha detaje se cili do të jetë kufiri maksimal i nxënësve të huaj për çdo klasë.
Sipas Fondazione ISMU, një institucion kërkimor në Itali, nxënësit që nuk kanë shtetësi italiane përbëjnë 11.6 për qind të të regjistruarve në shkollat italiane, pra afro 12 në çdo 100 nxënës.
“Duhet të shkosh në shkollë me fytyrë të zbuluar dhe në Itali askush, në emër të një tradite reale apo të supozuar, nuk mund të vendosë që një vajzë e re të fshihet”, tha Meloni.
