Marrëdhënia mes inteligjencës artificiale dhe botës reale vazhdon të prodhojë skena që duken sikur kanë dalë nga një film satirik. Këtë herë në qendër është Tilly Norwood, aktorja virtuale e krijuar me inteligjencë artificiale, e cila pësoi një defekt të pazakontë gjatë një interviste live.
Teksa po fliste për filmin e saj të ri, Misaligned, dhe po i përgjigjej pyetjeve për rolin e aktorëve realë dhe personazheve të krijuar me AI, sistemi i saj u ndërpre papritur. Në mes të fjalisë, Tilly la anglishten dhe nisi të fliste në gjuhën kineze, duke lënë të habitur moderatorët dhe të ftuarit në studio.
Incidenti ndodhi gjatë një interviste me Piers Morgan, ku e ftuar ishte edhe aktori Tom Conti. Pas ndërprerjes së çuditshme, Tilly kërkoi ndjesë dhe e përshkroi momentin si një “defekt të rrallë”, duke thënë se “telat ishin ngatërruar”.
Ngjarja është kthyer menjëherë në temë diskutimi, jo vetëm për anën komike të situatës, por edhe për kufijtë ende të paqartë të inteligjencës artificiale në industrinë e argëtimit. Tilly Norwood është prezantuar si një nga “aktoret” e para virtuale, por incidenti tregoi se edhe yjet digjitalë, sado të kuruar të duken, mund të dalin nga skenari në mënyrën më të papritur.
