Sekretari amerikan i Shtetit, Marco Rubio, e ka cilësuar marrëveshjen e arritur mes Shteteve të Bashkuara, Danimarkës dhe Groenlandës si një zhvillim historik dhe një fitore të rëndësishme për amerikanët.
Sipas Rubios, marrëveshja garanton në mënyrë afatgjatë interesat e sigurisë së SHBA-së në Arktik, pa krijuar kosto shtesë për taksapaguesit amerikanë. Ai theksoi se Groenlanda do të mbetet pjesë e zonës strategjike të mbrojtjes së Amerikës së Veriut, duke kufizuar mundësinë e pranisë së kundërshtarëve të Uashingtonit në territor dhe në zonat përreth.
Marrëveshja parashikon zgjerimin e pranisë ushtarake amerikane në Groenlandë, si dhe të drejta të përhershme për akses, vendosje ushtarake dhe fluturime. Gjithashtu, vendet jashtë NATO-s nuk do të lejohen të krijojnë baza ushtarake në ishull, ndërsa kufizime parashikohen edhe për investimet e ndjeshme që mund të lidhen me interesa të vendeve kundërshtare të SHBA-së.
Presidenti Donald Trump e ka paraqitur marrëveshjen si një zgjidhje për shqetësimet amerikane lidhur me sigurinë e Groenlandës dhe rajonit të Arktikut. Ndërkohë, Danimarka dhe Groenlanda kanë theksuar se marrëveshja duhet të respektojë sovranitetin dhe integritetin territorial të Mbretërisë së Danimarkës, si dhe të drejtën e groenlandezëve për vetëvendosje.
