Presidenti francez Emmanuel Macron ndodhet në Saint-Pierre-et-Miquelon, territorin francez në Atlantikun e Veriut pranë brigjeve të Kanadasë, ku këtë të diel do të takohet me kryeministrin kanadez Mark Carney. Vizita ka një peshë të fortë simbolike, vetëm pak javë pasi presidenti amerikan Donald Trump publikoi në rrjetet sociale një hartë ku edhe arkipelagu francez shfaqej i mbuluar nga flamuri amerikan.
Macron, i cili mbërriti në arkipelag të shtunën në mbrëmje, e bëri të qartë qëndrimin e Parisit për statusin e territorit. Presidenti francez tha se Saint-Pierre-et-Miquelon është territor francez, i lidhur me Francën dhe krenar për përkatësinë e tij, duke shtuar se për këtë çështje “nuk ka debat” apo diskutim.
Vizita është e para e një presidenti francez në Saint-Pierre-et-Miquelon që prej François Hollande në vitin 2014. Territori ka rreth 5,800 banorë, por Parisi i jep rëndësi të veçantë për shkak të pozicionit të tij strategjik në Atlantikun e Veriut, pranë Kanadasë, SHBA-së dhe Arktikut. Presidenca franceze e lidh rëndësinë e tij edhe me sovranitetin detar dhe praninë gjeostrategjike të Francës në rajon.
Takimi me Carney zhvillohet gjithashtu në një moment kur Kanadaja po përpiqet të thellojë marrëdhëniet me Europën, në sfondin e tensioneve tregtare dhe politike me Uashingtonin. Vetë qeveria kanadeze ka njoftuar se dy liderët do të diskutojnë forcimin e bashkëpunimit në energji, mbrojtje, minerale kritike, hapësirë, teknologji kuantike, satelitë dhe superkompjuterë.
Energjia pritet të jetë një prej pikave kryesore. Macron ka theksuar rëndësinë e burimeve kanadeze të naftës, gazit natyror dhe mineraleve kritike, ndërsa Franca kërkon të diversifikojë furnizimet në kushtet e pasigurisë së krijuar në tregjet ndërkombëtare të energjisë.
Por zgjedhja e Saint-Pierre-et-Miquelon për takimin ka edhe një dimension të qartë politik. Reuters e përshkruan atë si një sinjal në drejtim të Trump, pas publikimit të hartës amerikane dhe në një periudhë kur Kanadaja po afrohet më shumë me Bashkimin Europian.
Carney do të jetë kryeministri i parë kanadez që zhvillon një vizitë zyrtare në Saint-Pierre-et-Miquelon. Në axhendë janë një drekë pune dhe aktivitete të përbashkëta, përpara se të dy liderët të udhëtojnë drejt New Yorkut për Asamblenë e Përgjithshme të OKB-së.
