Një resort turistik luksoz me vlerë 1.4 miliardë euro do të ndërtohet në ishullin e Sazanit dhe Shqipëria do të jetë pjesë e këtij projekti si aksionere. Qeveria shqiptare ka themeluar një kompani shtetërore që do të përfaqësojë interesat e shtetit në këtë investim strategjik.
Në Qendrën Kombëtare të Biznesit është regjistruar kompania “Albanian State Development & Real Estate”, e cila do të veprojë si përfaqësuese e shtetit në marrëveshjet strategjike që lidhen me ndërtimin e resortit në Sazan apo projekte të tjera të miratuara nga Korporata e Investimeve.
Sipas të dhënave të regjistrit, kompania e re shtetërore do të merret me administrimin dhe zhvillimin e pasurive të paluajtshme në përdorim apo pronësi të saj, duke garantuar pjesëmarrjen në projekte investimi të miratuara zyrtarisht.
Shoqëria është krijuar me një kapital fillestar prej 50 milionë lekësh, të gjitha në pronësi të Korporatës së Investimeve Shqiptare. Ajo do të përfaqësojë Shqipërinë në projektin e ndërtimit të një marine, rezidencash luksoze, zonash gastronomike dhe struktura akomoduese në një sipërfaqe prej 45 hektarësh, që përfaqëson 8% të territorit të ishullit të Sazanit.
Ky projekt u shpall investim strategjik nga Komiteti i Investimeve Strategjike më 30 dhjetor 2023, pas propozimit nga kompania “Atlantic Incubation Partners LLC”, e lidhur me Jared Kushner, dhëndri i ish-Presidentit amerikan Donald Trump.
Projekti në Sazan është pjesë e një pakete investimesh të planifikuara nga Kushner dhe grupet e tij, të cilat përfshijnë edhe një tjetër resort të ngjashëm në zonën e Zvërnecit. Lajmi për themelimin e kompanisë shtetërore shqiptare u bë publik në të njëjtën kohë me vizitën e Ivanka Trump dhe Jared Kushner në Vlorë, ku u përfol për përgatitjen e fazave të para të zhvillimit të këtij superprojekti.
