Belind Këlliçi i ka kërkuar sot llogari Altin Dumanit pse ky i fundit nuk ka hetuar siç duhet krimet zgjedhore për votimet e 11 majit.
Kreu i SPAK, Altin Dumani, ka raportuar sot lidhur me krimet zgjedhore në eventin me temë “Përtej monitorimit: Drejt një reformë zgjedhore gjithëpërfshirëse për integritetin e zgjedhjeve në Shqipëri”.
“Janë ushtruar disa kontrolle banese, zyre personale. Janë ekzekutuar 20 vendime gjykate për lejim kontrolli të ambienteve të ndryshme dhe personave të ndryshëm, janë sekuestruar prova e dokumente të rëndësishme që do i shërbejnë procesit të hetimit,” tha ai, teksa shtoi se sfidat nuk janë të pakta, duke iu referuar materialeve të partive politike. Sipas tij, kallëzimet e depozituara në SPAK kanë qenë të paplota.
Një orë pasi ai ishte larguar nga takimi, Belind Këlliçi u duk i pakënaqur nga ky konstatim i Dumanit, duke pretenduar se kallëzimet e bëra nga PD ishin të mjaftueshme për të nisur hetimet. Duke i bërë iso këngës së Sali Berishës për “farsën zgjedhore”, Këlliçi ngriti zërin për padrejtësi ndaj opozitës, teksa herë pas here ai nuk harron të përmendë arrestimin e Erion Velisë si një sukses të denoncimeve të tij në SPAK.
Me gjasë, prokurorët e SPAK duhet të tregohen më të vëmendshëm ndaj deklaratave të deputetit të zgjedhur Belind Këlliçi, teksa ky i fundit herë pas here u kërkon llogari dhe u tregon se çfarë procedurash duhet të ndjekin për hetimet. Vetëm se Këlliçi nuk e ka ende formulën për vijimin e hetimeve ndaj tij, që SPAK ka nisur prej muajsh.
Ndoshta, për t’i rënë më shumë në sy shefit, duke ngritur zërin në korin berishian kundër SPAK-ut, Belind Këlliçi projekton edhe një vend të mirë në grupin parlamentar të PD-së. Sepse eksperienca ka treguar se sa më shumë të akuzosh SPAK-un e sa më lart ta ngresh tonin për Altin Dumanin, aq më të mëdha të vijnë shpërblimet nga kryetari i partisë. Dhe Belind Këlliçi ka një garë të fortë brenda partisë për të bërë karrierë.
