"Por kjo është një zgjedhje e tij dhe unë personalisht e kam thënë dhe e përsëris prapë, thelbin e lirisë e konsideroj të drejtën e zgjedhjes së njeriut. Ai ka bërë një zgjedhje, ka marrë një funksion, ka marrë një post, të cilin një demokrat nuk e merrte kurrë, por zgjedhja është e tij…Nuk kam dijeni për asnjë rast tjetër. Nuk kam dijeni, por rasti i tij është evident. Nuk më njoftoi se do merrte një funksion në një vend ku rrinë nga 3 muaj zakonisht, në Vlorë. Por është zgjedhja e tij, kaq është ajo. Investimin ai e ka pasur në PD, se si gjeti këtë vlerësim të lartë nga partia e krimit, është puna e tij, nuk kam dijeni”, tha Berisha.
Në të njëjtën dalje për mediat, Berisha denoncoi një tjetër rast të rëndë, që sipas tij, përbën blerje votash në zonën e Freskut në Tiranë. Kreu i PD-së tha se janë dhënë në mënyrë të paligjshme leje legalizimi dhe certifikata pronësie në këmbim të votave. “Sipas të dhënave tona, në të gjithë vendin janë dhënë 5,994 leje legalizimi në periudhën e ndaluar me ligj. Minimumi 3-5 vota janë blerë me secilën prej tyre. Ky është një shembull klasik i përdorimit elektoral të shtetit përmes ushtrimit të paligjshëm të fuqisë ekzekutive”, deklaroi Berisha. Ai akuzoi mazhorancën se po përdor institucionet shtetërore si mjete për manipulim elektoral dhe blerje të vullnetit të qytetarëve përmes premtimeve dhe dhënies së pronave publike.
