Kreu i Partisë Demokratike, Sali Berisha, në një deklaratë të fortë nga selia blu, akuzoi kryeministrin Edi Rama për manipulim të zgjedhjeve të 11 majit dhe e cilësoi procesin si një farsë elektorale. Ai theksoi se rinumërimi i votave është kërkesë e kandidatëve të PD-së dhe jo një nismë zyrtare e partisë.
“Rinumërimi nuk është kërkesë e PD-së, por e kandidatëve tanë, të cilëve nuk mund t’u mohohet kjo e drejtë. Vota vdiq pa hyrë në kuti,” deklaroi Berisha.
Në vijim, Berisha sulmoi ashpër edhe drejtuesen e “Top Channel”, Vjollca Hoxha, duke e akuzuar se po përpiqet të mbulojë skandalet e Ramës përmes editorialeve të kontrolluara politikisht.
“Fox News damkosi Edi Ramën si ‘RamaDuro i Europës’, por Vjollca Hoxha mundohet të mbrojë këtë regjim me editoriale që sfumojnë të vërtetën. Zonjë, para se të sulmosh Fox-in, më mirë kontrollo rregullat e gazetarisë që duhet të ndjekësh,” tha ai.
Berisha shtoi se mediat e kontrolluara nga qeveria po përpiqen të zhvendosin vëmendjen nga kriza e zgjedhjeve duke u mbështetur në zhvillimet ndërkombëtare si lufta në Lindjen e Mesme, ndërsa paralajmëroi se beteja për rikthimin e votës së lirë nuk do të ndalet.
“Armiku më i egër i njeriut është ai që i dhunon votën dhe fjalën e lirë. Edi Rama është në garë me Nicolás Maduron dhe në disa aspekte është edhe më i zi,” përfundoi Berisha.
