Kandidati për deputet, Aulon Kalaja, ka kritikuar hapur Partinë Demokratike për humbjen në zgjedhjet e 11 majit. Në një intervistë për mediat, Kalaja tha se suksesi elektoral i disa kandidatëve të Partisë Socialiste tregon dobësinë e opozitës dhe paaftësinë e saj për të ofruar një alternativë reale.
Kalaja tha se mund të vidhen 40 apo 50 mijë, por 300 mijë nuk mund të vidhen dhe sipas tij kjo vjen për shkak se PD refuzon të kuptojë gjendjen ku ndodhet.
“Janë 300 mijë vota diferencë, nuk janë 30 mijë. Nuk mund të thuash se të janë vjedhur kaq shumë vota. Le të themi që janë vjedhur 40 apo 50 mijë, por 300 mijë nuk vjedhen. PD refuzon të kuptojë gjendjen ku ndodhet” u shpreh ai.
Ai solli shembullin e një kandidati të PS-së në Durrës që kaloi nga 2.500 vota në 2021 në mbi 21.000 vota në zgjedhjet e fundit, duke lënë pas edhe vetë Edi Ramën në numër votash. Për Kalajën, kjo nuk është domosdoshmërisht një tregues manipulimi, por mungesë konkurrencë nga opozita.
Ai kritikoi faktin që shumë figura në qeveri nuk janë të njohur publikisht, por këtë e lidhi me mungesën e një sistemi vlerash në shoqëri dhe në politikë.
Kujtojmë se Kalaja ishte një nga kandidatët e parë që kërkoi rinumërim të votave në qarkun e Durrësit, pasi pati dyshime se i janë tjetërsuar votat nga kolegë të tjerë brenda listës së PD. Por rinumërimi nuk solli ndryshime të rezultatit dhe Kalaja kështu nuk siguroi mandatin e deputetit.
