Kryeministri Edi Rama ka reaguar për herë të parë pas përshkallëzimit të konfliktit Izrael-Iran dhe pas bombardimeve të ndërmarra nga Shtetet e Bashkuara të Amerikës ndaj tri objekteve bërthamore iraniane – Fordow, Natanz dhe Isfahan – natën e 21 qershorit. Në një postim të fortë në platformën X (ish-Twitter), Rama shprehu mbështetje të plotë për vendimin e Presidentit amerikan.
“Mbështesim përpjekjet e Trump për të parandaluar që regjimi teokratik i Iranit të pajiset me armë bërthamore!”, deklaron Rama.
Kryeministri vuri theksin te karakteri ideologjik dhe kërcënues i regjimit iranian, të cilin e përshkruan si një “teokraci e armatosur me retorikë apokaliptike”.
“Ky nuk është thjesht një shtet tjetër bërthamor. As thjesht një diktaturë me ambicie bërthamore. Kjo është një teokraci – e armatosur me retorikë apokaliptike, e zhytur në shtatëdhjetë vjet duke i cilësuar kombet e lira si ‘Satanike’ dhe duke bërë thirrje të hapura për shfarosjen e tyre. Nga çdo aspekt, është një devijim i veçantë – ndryshe nga çdo shtet i armatosur bërthamor, pavarësisht sistemit politik.”
Në deklaratën e tij, Rama bën edhe një lidhje simbolike mes së kaluarës së errët të Shqipërisë.
“Si një komb që doli nga humnera e një regjimi brutal ateokratik, si një anëtar krenar i botës së lirë dhe si një partner strategjik i Shteteve të Bashkuara, Shqipëria mbështet fuqimisht përpjekjet e sinqerta të Presidentit Trump për të parandaluar që regjimi teokratik në Teheran të pajiset ndonjëherë me armë bërthamore.”
Mbështetja e Shqipërisë, përmes një deklarate të drejtpërdrejtë të kryeministrit Rama, e vendos vendin krah për krah me Uashingtonin në këtë moment kritik të diplomacisë dhe sigurisë ndërkombëtare.
