Kuvendi i ri që pritet të nisë punën në shtator, duket se do të sjellë përballje të reja mes figurave të Partisë Demokratike dhe emrave të rinj të dalë nga radhët e Partisë Socialiste.
Dy prej përballjeve më të spikatura janë ato mes Sali Berishës dhe Sara Milës, si dhe Gazment Bardhit dhe Zegjine Çaushit. Këto duele politike kanë nisur që gjatë fushatës elektorale dhe duket se do të vijojnë edhe në sallën e Parlamentit.
Sara Mila, e cila mori një numër rekord votash në Elbasan, u vu në qendër të vëmendjes kur kreu i PD-së, Sali Berisha, e akuzoi publikisht për lidhje me eksponentë të botës së krimit. Akuzat nga ana e Berishës kanë vijuar edhe pas zgjedhjeve, duke e përdorur emrin e Milës si simbol të ndërhyrjes së krimit në zgjedhjet e 11 majit.
Deputetja më e re socialiste nga ana tjetër nuk i ka marrë dhe aq seriozisht etiketimet e kryedemokratit për ta denoncuar për shpifje, përkundrazi duket sikur ka parë anën pozitive të reklamës që i ka bërë. Dhe në ato pak dalje që ka bërë për mediat pas zgjedhjeve, i është përgjigjur me të qeshur duke paralajmëruar disa herë se përgjigjen Berisha do ta marrë në Kuvend.
Ndërkohë, në qarkun e Fierit është shfaqur një tjetër përballje e ndezur, ajo mes Zegjine Çaushit dhe Gazment Bardhit. Bardhi ka akuzuar në mënyrë të vazhdueshme drejtuesen politike të PS në Fier, Belinda Ballukun, dhe në disa raste, deputetja e re e PS-së i është përgjigjur me tone ironike, shpesh duke përdorur humorin dhe dialektin vendas. Kjo qasje i ka sjellë asaj vëmendje mediatike dhe ka ndikuar pozitivisht në rezultatin e saj elektoral.
Ndryshe nga Mila, Çaushi ka qenë më aktive në replika, duke kërkuar hapur përballjen me Bardhin, ndërsa ky i fundit deri më tani ka zgjedhur të mos e përmendë drejtpërdrejt, por nuk ka lënë pa e përfshirë në retorikën kundër PS-së në Fier.
Tashmë, të dyja përballjet janë gati të transferohen në sallën e Parlamentit.
Ndoshta për Berishën dhe Bardhin mund të duket e lehtë pasi kanë eksperiencën si favor. Por duhet të kenë parasysh faktin se përballë do kenë dy emra të rinj që përveçse i kanë mundur thellë në zonat ku kanë kandiduar, tashmë po marrin dhe leksione në Akademinë Politike të Partisë Socialiste.
