Kryetari i Partisë Demokratike, Sali Berisha, pas katër ditësh mungesë, është rikthyer në konferencat e zakonshme për mediat për të denoncuar sipas tij farsën zgjedhore.
Berisha nuk la pa komentuar edhe procesin e rinumërimit të votave, i cili ka rezultuar që tjetërsim të votës ka pasur mes kandidatëve të PD, ku votat ia kanë marrë njëri-tjetrit. Për ta justifikuar këtë, kreu i Pd në konferencën e sotme tha se rinumërimi është një kërkesë e kandidatëve dhe jo kërkesë primare e PD.
“Rinumërimi i votave është kërkesë e kandidatëve dhe ata janë mbështetur nga PD. Nuk është kërkesë primare e Partisë Demokratike. Kërkesa e PD ka të bëjë me legjitimitetin e zgjedhjeve. PD kërkon që të plotësohen kërkesat e kandidatëve tanë, që kanë pretendimet e tyre dhe ne mbështesim patjetër transparencën. Për PD, vota ka vdekur pa hyrë në kuti”, u shpreh ai.
Në fakt, rinumërimi i votave të kandidatëve nuk ka qenë një dëshirë e kreut të PD. Kjo u vu re para disa javësh kur partia nuk i sqaroi kandidatët për mënyrën që duhej të ndiqnin që të depozitonin kërkesat, por i la me vullnetin e tyre deri kur KAS me vendim edhe të përfaqësuesve të djathtë, i rrëzoi kërkesat si të depozituara jo sipas ligjit.
Dhe jo më kot Berisha nuk e donte rinumërimin, pasi e dinte shumë mirë që do t’i kthehej në një bumerang PD–së, siç po rezulton, ku vjedhja e votave ka ndodhur mes kandidatëve të të njëjtës listë. Fakt për të cilin sot u detyrua që ta justifikonte duke thënë se kërkesat s'janë të PD por të kandidatëve. Kur në fakt, nuk ka rëndësi kush e bën kërkesën, por rëndësi ka që një parti e cila akuzon kundërshtarin për vjedhje të votës, rezulton që ka pasur në listë kandidatë që kanë vjedhur votat e kolegëve.
