Rinumërimi i votave në qarkun e Tiranës ka evidentuar lëvizje të vogla votash në listat preferenciale të kandidatëve, si për Partinë Demokratike ashtu edhe për Partinë Socialiste.
Në listën e PD-së, kandidati Ilir Alimehmeti kishte ngritur pretendime për zhvendosje votash në favor të kandidatëve të tjerë. Nga rinumërimi i 85 kutive të para, rezulton se atij i mungojnë 4 vota krahasuar me të dhënat e 11 majit. Ndërkohë, Jorida Tabaku, një tjetër kandidate e kësaj liste, rezulton me 11 vota më shumë pas rinumërimit.
Disa kandidatë të tjerë të PD-së, si Petrit Doda, Petrit Gjorgji dhe Edit Harxhi, rezultojnë të kenë përfituar nga 10 deri në 14 vota më shumë në procesverbal, ndërsa Ilda Zhulalit i janë hequr 13 vota në numërimin e parë.
Në kampin socialist, Fatmir Xhafaj rezulton me numrin më të madh të votave të regjistruara më tepër se sa ishin në kuti. Po ashtu, Kejsi Elezi dhe Sofika Lleshi rezultojnë secila me nga 22 vota më shumë.
Sa i përket garës mes Olta Xhaçkës dhe Blerina Gjylametit brenda listës së PS-së, rinumërimi nuk ka sjellë ndryshim në renditje. Xhaçka ka rezultuar me një votë më shumë, ndërsa Gjylametit i mungojnë dy vota krahasuar me procesverbalet e mëparshme.
Procesi i rinumërimit vijon, ndërsa rezultatet përfundimtare do të konfirmohen nga Komisioni Qendror i Zgjedhjeve.
