Protesta qytetare dhe raporti i saj me partitë politike ka sjellë një debat të fortë mes aktivistit të Qëndresës Qytetare, Migen Qiraxhi, dhe nënkryetarit të Partisë Demokratike, Nikola Kedhi, në emisionin në A2 CNN.
Në qendër të përplasjes ishte pikërisht pyetja se kë përfaqëson protesta dhe nëse ajo mund të identifikohet me opozitën politike.
Kedhi deklaroi se Partia Demokratike e ka mbështetur protestën, ndërsa Qiraxhi argumentoi se demokratët kanë qenë pjesë e saj si qytetarë, por se thirrjet e protestuesve, sipas tij, kanë shënjestruar njëkohësisht lidershipin e PS-së dhe atë të PD-së.
“Ju thoni që PD ka qenë në protestë dhe e ka mbështetur protestën”, tha Qiraxhi.
“Patjetër që e ka mbështetur protestën”, iu përgjigj Kedhi.
Qiraxhi ngriti më pas pikëpyetjen se përse PD kërkon një organizim strukturor partiak, kur demokratët nuk kanë qenë të përjashtuar nga protesta qytetare.
“Demokratët s’kanë qenë të përjashtuar nga protesta e qytetarëve. Është targetuar lidershipi i PS dhe PD. Kanë identifikuar qytetarët dy vetë që i kanë bllokuar të gjithë resurset”, tha ai, duke iu referuar Edi Ramës dhe Sali Berishës.
Kedhi kundërshtoi përgjithësimin, duke theksuar se brenda protestës ka qëndrime të ndryshme.
“Aty ka grupime të ndryshme”, tha ai.
“Kështu thotë edhe Rama mo, ka ca qytetarë të mirë që s’duan dorëheqjen time”, replikoi Qiraxhi.
Debati për protestën u zhvendos më pas te lidershipi i PD-së dhe raporti mes brezit të vjetër dhe të rinjve në parti.
“Kam keqardhje që edhe sot këtu po merremi me emra. Këtu po ikën Shqipëria, ne merremi me emra!”, tha Kedhi.
“Emrat janë përgjegjës. E vjetra ta ka zënë rrugën ty”, iu përgjigj Qiraxhi.
“Kush ma ka zënë rrugën mua?! Kryesia e PD sot përbëhet nga 16 të rinj”, reagoi nënkryetari demokrat.
Qiraxhi e mbylli replikën me një krahasim: “Këtë bënte edhe Enver Hoxha.”
