Kryetari i grupit parlamentar të PD, Gazment Bardhi, ka sulmuar hapur SPAK-un në mbledhjen e Komitetit Parlamentar të Stabilizimit dhe Asociimit mes Bashkimit Europian dhe Shqipërisë.
Duke iu referuar Task Forcës kundër krimet zgjedhore që u krijua disa muaj para zgjedhjeve, Bardhi me gjuhën e Berishës sulmoi Prokurorinë e Posaçme duke thënë se puna e saj u ndalua në mënyrë të papritur pas deklaratës publike të Kryeministrit Edi Rama.
“Kryeministri i kërkoi Prokurorisë së Posaçme të ndalojë çdo veprim në terren, të mos survejojë partitë politike, të mos ndjekë administratën dhe të mos ushtrojë trysni mbi të. Që nga ai moment, nuk u pa më asnjë veprim i prokurorëve në terren dhe nuk pati asnjë rezultat konkret për parandalimin e krimeve zgjedhore”, theksoi Bardhi.
Kjo është hera e parë që Bardhi është në sinkronë me kryetarin e tij duke anatemuar SPAK-un. Kujtojmë se deri para zgjedhjeve, ndryshe nga Berisha, shprehej se Prokuroria e Posaçme kishte të metat e saj por e mbështeste në punën që bënte.
Ndoshta humbja e thellë që pësoi në qarkun e Fierit, e detyron Bardhin të gjej fajtor edhe SPAK-un. Megjithatë, nuk përjashtohet as mundësia që, në një kohë kur nuk do ketë më influencën në grupin e ri parlamentar apo në PD, Bardhi “detyrohet” të rreshtohet në llogoren e Berishës në “luftën” me SPAK.
