Fox News ka publikuar një artikull kritik ndaj Kryeministrit shqiptar Edi Rama, me autor ish-ambasadorin Agim Nesho. Në shkrim, Rama etiketohet si “Ramaduro”, një paralelizëm me Nicolás Maduron, për mënyrën se si ka konsoliduar pushtetin në Shqipëri përmes lidhjeve me George Soros dhe mbështetjes së elitave progresiste europiane. Artikulli ngre akuza për korrupsion, autoritarizëm dhe manipulim elektoral, duke e paraqitur Shqipërinë si një narco-shtet të toleruar nga Perëndimi. Nesho bën thirrje që SHBA të ndërhyjnë me presion diplomatik për rikthimin e demokracisë në vend.
Artikulli
Takoni Ramaduron: Autokrati progresist i Europës, i trajnuar nga Sorosi dhe armik i Trumpizmit
Nga Amb. Agim Nesho – Fox News
Ndërsa Europa pretendon të mbrojë demokracinë, në heshtje po fuqizon autokratë si Kryeministri i Shqipërisë, Edi Rama. I rizgjedhur për një mandat të katërt me një supermazhorancë që i jep mundësinë të ndryshojë edhe Kushtetutën, Rama tashmë quhet nga kritikët “Ramaduro” – një krahasim me Nicolás Maduron e Venezuelës – për shkak të akuzave për korrupsion, tendencave autokratike dhe mjeshtërisë në mashtrimin politik.
I formuar nga George Soros dhe organizata “Shoqëria e Hapur”, Rama është shndërruar në një kameleon politik – duke përshtatur imazhin e tij sipas interesave të elitave globale dhe autokratëve rajonalë.
SOROS KUNDËR TRUMP: Socialistët godasin konservatorët në zgjedhjet shqiptare
I bindur ndaj Kryeministres italiane Giorgia Meloni, bashkëpunues me Presidentin turk Recep Tayyip Erdoğan dhe mbështetës i Presidentit francez Emmanuel Macron në këmbim të më shumë ndikimi në Ballkan, Rama ka siguruar mandatin e katërt radhazi në zgjedhje që shumë i përshkruajnë si të manipuluara – e papranueshme për një shtet anëtar të NATO-s dhe aspirant për BE.
Rama u ngrit nga përfaqësues i Shoqërisë së Hapur në Tiranë, në drejtues të një vendi me një nga trashëgimitë më brutale të komunizmit në Europë. Kritikët e përshkruajnë si një narcisist dhe anarkist, produkt i ndikimit post-komunist të Sorosit në Europën Lindore. Ai ka konsoliduar pushtetin në Shqipëri, ndërsa ka shtyrë përpara nismën e Sorosit “Ballkani i Hapur”. Më vonë, ka marrë një rol të ri: një progresist socialist që ka punuar për të minuar nismat e epokës Trump në Europë.
I njohur për retorikën anti-Trump – përfshirë deklaratën e famshme në CNN dhe Foreign Policy ku e quajti Trump-in “turpin e civilizimit tonë” – Rama u kthye në të preferuarin e elitave europiane dhe demokratëve amerikanë. Mbijetesa e tij politike është ndërtuar mbi një aleancë me rendin anti-Trump, edhe pse udhëheqja e tij e brendshme ka marrë një drejtim gjithnjë e më autoritar.
Sot, ndërsa Europa përballet me një botë multipolare dhe sfida gjeopolitike komplekse, ajo gjithnjë e më shumë i toleron – në mos i përqafon – liderë si Rama. Pse? Sepse ai deklaron besnikëri ndaj “vlerave europiane”, edhe pse qeveris, sipas kritikëve, një narco-shtet të ngritur mbi krimin e organizuar dhe manipulimin elektoral.
Rama përfaqëson një version europian të modelit Chávez-Maduro: një autokrat i majtë i veshur me gjuhë progresiste, që ushtron pushtetin me pak respekt për normat demokratike. Ai mishëron atë që quhet “stabilokraci” në Ballkan – regjime që tolerohen për hir të stabilitetit rajonal, edhe nëse minojnë vlerat që Europa pretendon të mbrojë.
Përpjekja e fundit e Sekretarit amerikan të Shtetit Marco Rubio për të bllokuar Chevron nga rinovimi i kontratës në Venezuelën e Maduros është një shembull i qartë i udhëheqjes me parime – duke mos njohur legjitimitet e burime për regjime autokratike. Amerika duhet të ketë të njëjtën qartësi edhe për Ballkanin.
Madje edhe shumë shqiptarë tashmë e quajnë liderin e tyre “Ramaduro” – një thirrje e dëshpëruar drejt Shteteve të Bashkuara për ndihmë në rivendosjen e demokracisë. Qëndrimi i SHBA-ve duhet të jetë një sinjal zgjimi për një Europë që është bërë shumë komode duke bashkëjetuar me regjime mafioze të ngritura mbi korrupsionin dhe shtypjen.
Europa nuk mund të justifikojë mbështetjen për autokratët, vetëm sepse kritikët e tyre janë konservatorë apo të lidhur me Presidentin Trump.
Ka ardhur koha që diplomacia amerikane të marrë hapa konkretë: më shumë presion ndaj udhëheqjes shqiptare, mbështetje publike për zgjedhje të lira dhe të ndershme dhe një mesazh i qartë: Aleanca me vlerat perëndimore matet me vepra, jo me deklarata boshe.
