Tensione në rritje këtë të hënë në Pallatin e Sportit “Farie Hoti”, ku po zhvillohet procesi i rinumërimit të votave. Kandidati i Partisë Demokratike, Asllan Dogjani, është shoqëruar nga forcat e policisë jashtë ambienteve të rinumërimit, pasi sfidoi vendimin e Komisionit të Ankimimeve dhe Sanksioneve (KAS), duke hyrë sërish në sallë, pavarësisht ndalimit zyrtar për të marrë pjesë në proces.
Dogjani ishte përjashtuar nga KAS pas një përplasjeje të fortë verbale me anëtarët e këtij komisioni, ku u regjistruan debate të ashpra dhe akuza për manipulim votash. Pas largimit fillestar nga salla dhe firmosjes së shkresës që i ndalonte hyrjen, ai u rikthye brenda pak minutash në ambientet e rinumërimit, duke thyer vendimin dhe duke tensionuar më tej situatën. Menjëherë pas kësaj, forcat e rendit ndërhynë dhe e shoqëruan jashtë sallës për të garantuar zbatimin e vendimit dhe mbarëvajtjen e procesit.
Dogjani pretendon për vjedhje votash dhe ka paralajmëruar se do t’i drejtohet SPAK-ut me prova konkrete. Megjithatë, sipas të dhënave zyrtare, ai ka arritur të sigurojë 7,290 vota, një rezultat që nuk e bën pretendent për sigurimin e mandatit.
Përplasjet e fundit, edhe pse të zhurmshme, nuk pritet të kenë ndikim në përbërjen përfundimtare të përfaqësimit politik në qarkun ku ai kandidoi.
