Drejtuesi politik i qarkut të Fierit, Gazment Bardhi, është rishfaqur pas shumë kohësh në media që pas humbjes se thellë që pësoi në këtë qark. Në emisionin “Log” në Neës24, Bardhi justifikoi humbjen duke thënë se pavarësisht se ishte një masakër zgjedhore, kjo nuk është hera e parë që PD merr vetëm katër mandate në Fier.
Sipas tij, faj kanë dhe qytetarët që pranuan frikën.
“PD ka marrë katër mandate, pra në të gjithë historikun e këtij sistemi, ka lëvizur mes katër deri në gjashtë mandate. Tre herë ka marrë katër mandate, dy herë ka marrë 6 mandate në 2009-ën dhe në 2021-in. Pra nuk është keqardhja ime rezultati. Sigurisht do të kisha dashur të kishim një rezultat tjetër jo thjesht në qarkun e Fierit, por në nivel kombëtar. Keqardhjen më të madhe kam pasur për qytetarët që jo thjesht kishin frikë, por kishin filluar ta pranonin frikën”, tha Bardhi.
Deputeti i PD gjithashtu më tej hodhi akuza edhe për prokurorët e SPAK që ishin caktuar në Fier për hetimin e krimeve zgjedhore. Sipas tij, dy prokurorët nuk kishin nivelin e duhur profesional.
“Asnjë denoncim i joni jo vetëm nuk është marrë në konsideratë nga Prokuroria e Posaçme, por po ju them kemi marrë përgjigje qesharake që nuk përputhen me nivelin, të paktën sa unë i njoh të dy prokurorët që ishin deleguar në Fier, nuk përputhen me nivelin e tyre profesional. Pra nuk kanë atë nivel profesional, diçka e madhe i ka detyruar të shkruajnë gjëra të tilla qesharake”, u shpreh Bardhi.
Drejtuesi politik i PD vijoi më tej me gjuhën e kryetarit të tij, Sali Berisha, duke hedhur akuza të tjera për përfshirjen e shtetit në zgjedhjet e 11 majit, por që nuk gjeti asnjë gabim tek forca politike që përfaqëson për humbjen dërrmuese që morën.
