Kandidati i PD, Ilir Alimehmeti, e ka quajtur të drejtë reagimin e deputetit socialist Erion Braçe se po i hiqen vota qëllimisht, edhe përse vullneti i votuesve sipas tij është shprehur qartazi.
“Votuesi është shprehur te mbiemri dhe nuk ka asnjë çudi që 1 në 200 veta ka votuar te mbiemri. Pastaj e numëron KQZ apo jo, i takon asaj. Por e numëron njëherë dhe pastaj jo, edhe këtë duhet ta shpjegojë. KAS ka vendosur që të gjitha këto të mos i numërojnë. Braçe këtu ka të drejtë. Këto nuk janë të shtuara. Ata nuk e quajnë të vlefshme, por kjo është shprehje vullneti. Nuk mund t’i ngatërrosh këto me vota të vjedhura”, tha ai.
Qëndrimi i Alimehmetit tingullon paksa i çuditshëm duke qenë se në javët pas zgjedhjeve ka ngritur vazhdimisht shqetësimin për standartin e zgjedhjeve dhe respektim të ligjit dhe institucioneve. Edhe në këtë rast, rregulli është që qytetarët të votojnë brenda kutizave përball subjektit politik apo emrit të kandidatit. Çdo shenjë tjetër jashtë këtyre e bën fletën e pavlefshme.
Në fletët e publikuara nga Braçe shihet qartë se votuesit kanë vendosur shenjën jashtë kutisë, çka mund të interpretohet edhe si një formë shit-blerjeje të votës, ku votuesi dëshmon kandidatit se ka votuar për të.
