Genc Deromemaj, ish-kryetar i degës së PD në Vlorë, është emri më i fundit që largohet nga kjo forcë politike për t’iu bashkuar administratës së Edi Ramës. Ai është emëruar sot në krye të Kadastrës së Vlorës, një zhvillim që ka ngjallur reagime për shkak të rrugëtimit të tij politik të lëkundur ndër vite.
Ky ndryshim kursi vjen si surprizë, sidomos për faktin që Deromemaj ka qenë jo vetëm një figurë drejtuese në strukturat e PD-së, por edhe një kritik i hershëm i qeverisë Rama, veçanërisht për mënyrën si janë trajtuar investimet në qytetin bregdetar.
Deromemaj u bë emër i njohur në PD në zgjedhjet vendore të vitit 2015, kur u përzgjodh nga Lulzim Basha si kandidat për kryetar bashkie në Vlorë. Edhe pse humbi thellë, karriera e tij në PD mori hov, dhe në vitin 2018 ai u zgjodh në krye të degës në këtë qytet.
Për tre vite, ai ishte një bashkëpunëtor i afërt i Bashës, deri në vitin 2021 kur u rreshtua krah Sali Berishës, duke qenë një nga figurat kyçe në Komisionin e Rithemelimit të PD-së. Gjatë betejës për të rikthyer PD-në në duart e Berishës, Deromemaj ka qenë tepër aktiv në intervista televizive dhe ishte një nga zërat publik të “Foltores”.
Megjithatë, duket se as ky kthim te Berisha nuk i ka përmbushur pritshmëritë e tij. Kalimi në Partinë Socialiste, i shoqëruar me një emërim jo të vogël në administratë, tregon një tjetër kthesë të fortë në rrugëtimin politik të Deromemajt.
‘Kapërcimi’ nga Basha, te Berisha dhe më pas te Rama, mesa duket e ka parashikuar që do të shkaktojë interes publik dhe për të shmangur valën e reagimeve, Deromemaj ka fshirë edhe rrjetet e tij sociale.
Por veprimi i tij nuk ka vend për gjykim kur shikon se si PD jo vetëm po shkon nga humbja në humbje, por nuk ofron asnjë shpresë se do kthehet në alternativë. Dhe në këtë rast vlen ironia se “vitet ikin tutje, ikin një nga një, por partia nuk bën gjë”.
Deromemaj nuk është i vetmi nga PD e Vlorës që ka ndërruar kah politik. Para zgjedhjeve të 11 majit, një pjesë e forumit rinor në Vlorë si dhe pedagogia më stoike e çadrës të vitit 2017 në Bulevard, Zamira Sina, gjithashtu iu bashkuan Partisë Socialiste.
