Në një reagim në rrjetet sociale, Braçe shprehet se në njësinë nr. 5 në Tiranë, gjatë procesit të rinumërimit, janë shpallur të pavlefshme vota të cilat më herët ishin vlerësuar si të vlefshme nga KZAZ.
Braçe ka ndarë fotot e disa votave të tij që KAS i ka shpallur të pavlefshme.
“Tirana/5, sa turpi i rinumërimit! Këto janë vota të PS dhe të miat – shihini; po i shpallin të pavlefshme!
Të gjitha të vlerësuara gjatë numërimit nga KZAZ, në bazë të një manuali të KQZ, që tani nuk është më gjëkundi! Nuk ia kam borxh kurrkujt këtë lloj pisllëku, shoqëruar me shënimin “votë më shumë” dhe nënkuptimin “të vjedhura”!
Janë vota të pastra që KAS po i kthen në të pavlefshme! As ia kam marrë kujt, e as ia kam vjedhur kujt! Është votë ku është shprehur qartë vullneti i votuesit!
Nuk di se si e kanë planin, kujt KAS po kërkon t’ia heqë këto vota, pra kujt do t’ia marrë mandatin, por i bën muuuu që ky është turp”, shkruan Braçe.
Nëse shikon fletët e votimit që vetë Braçe ia publikuar ato duken si fletë votimi të plotësuara qëllimisht ashtu që Kandidati të dallojë se cili është votuesi.
Dhe janë të gjitha pothuaj njesoj.
Nëse vëzhgon me kujdes, nuk kuptohet se cili është motivi që votuesi zgjedh që kryqin t'a vendosë pas emrit të kandidatit, kur mund t'a kishte vendosur lehtësisht brenda kutisë përkatëse.
Ato fletë votimi mund të arsyetoheshin edhe nga opozita si raste të pastra të shit-blerjes së votës.
Në rast se nuk fotografon dot votën atëherë merresh vesh më parë me kandidatin që shenjën ta bësh të dukshme. Është njësoj sikur të firmosën në fletën e votimit.
Droja e Erjon Braçes se dikush po kërkon ti heqë mandatin, kur dihet se ai është nga më të votuarit në Qark, mund të justifikohet vetëm me dijeninë që mund të ketë vetëm Erjon Braçja lidhur me sasinë e kësaj tipologjie fletësh.
