Përplasja në PD pas humbjes së zgjedhjeve mesa duket ka filluar dhe këtë e dëshmon deklarata e deputetit Luan Baçi, i cili në një intervistë në MCN është shprehur se drejtuesit politikë në qarqe duhet të mbajnë përgjegjësi duke filluar që nga Gazment Bardhi, Luçiano Boçi, Oerd Bylykbashin e të tjerët me radhë.
Baçi bëhet emri parë në PD, që kërkon përgjegjësi brenda partisë për humbjen e rëndë të Partisë Demokratike në zgjedhjet e 11 majit.
“Drejtuesi politik të gjithë qarqeve kanë përgjegjësinë kryesore, e përsëris sa herë të më pyesin. Drejtuesit politik kishin kompetencat dhe për të bërë listat, dhe për të drejtuar, dhe për të ndarë zonat.
Duke qenë njerëzit me kompetencat e tyre që, nëse ne do ishim fitues, do të ishin ata që ishte qeveria e ardhshme, siç do kishe privilegjet, duhet të kesh përgjegjësi. Këtu nuk dalloj asnjë, as Bardhin, as Boçin në Shkodër, as Bylykbashin në Durrës. Performanca në Shkodër e Durrës ishte më e mirë se në qarqet e tjera, por ishim dobët. Ishte rezultat që dhe unë jam skandalizuar. Arsyet janë nga më të shumta” është shprehur ai.
Por Baçi humbjen e sheh vetëm tek drejtuesit politik dhe jo tek Berisha, pasi sipas tij kreu i PD nuk hyn tek drejtuesit që disa i ka afër dhe disa larg. Madje ai thotë se po të mos ishte Berisha, PD nuk do kishte as 10 mandate.
“Berisha nuk hyn tek drejtuesit që disa i ka afër dhe disa larg. Është i baraslarguar, shtetar. Komunikimin e kam, por nuk e quaj veten njeri shumë të afërt. I sheh të gjithë në të njëjtin pozicion.
PD do të hyjë në një analizë. Besoj në shtator, pasi të mbarojë denoncimi i kësaj farse. Do të jenë strukturat që do mblidhen dhe do marrin vendime. Po të mos ishte Berisha në krye të kësaj fushate ne nuk do të kishim as 10 deputetë. PD shkrihej”, tha ai.
