Gara brenda Partisë Socialiste më 11 maj, sidomos në Tiranë, ka krijuar jo pak pakënaqësi dhe hatërmbetje mes kolegësh. Kjo “luftë” politike brenda PS ka qenë më e ashpër pikërisht mes kandidatëve ministra dhe kolegëve të tjerë në listën e Edi Ramës. Një ndër më të përfolurit brenda mazhorancës ka qenë Blendi Gonxhja, i cili arriti të renditej i pari në Tiranë, me një rekord votash preferenciale.
Në një intervistë për A2 CNN, deputeti i sapozgjedhur iu përgjigj për herë të parë aludimeve të ngritura brenda partisë së tij, lidhur me përdorimin e pozicionit si ministër për të ndikuar në rezultatin elektoral, përmes presionit ndaj administratës së gjerë që ka në varësi.
“Nuk mund të vërtetojë dot askush, kurrë, një provë të vetme që unë, apo kandidatë të tjerë ministra, të kemi ndikuar apo ushtruar trysni për të ndikuar votën e administratës apo të atyre që punojnë për ne”, deklaroi Gonxhja për A2 CNN.
Për ata që mbeten skeptikë ndaj deklaratës së tij, Gonxhja fton të ndjekin rrugën institucionale: “Kush ka pretendime të tilla është i ftuar t’i çojë në organet kompetente për t’i vërtetuar ato”.
I pyetur për zërat që qarkullojnë në media dhe në radhët e vetë socialistëve, se ai mund të jetë kandidatura e ardhshme për Bashkinë e Tiranës në rast të largimit të Erion Veliajt, Gonxhja shfaqet i matur dhe i kujdesshëm, duke shmangur çdo përplasje të mundshme me drejtuesin aktual të bashkisë dhe duke respektuar linjën zyrtare të partisë.
“Kur përballesh me një pritshmëri pozitive, apo kur opinioni publik mund të mendojë pozitivisht për një kandidaturë, kushdo qoftë ai, natyrisht do të ishte një moment pozitiv. Nuk ka asnjë lloj ambicie timen në këtë drejtim dhe nuk ka asgjë konkrete që të lidhet me personin tim. Unë mendoj që nuk jemi fare në këtë moment për zgjedhje në Bashkinë e Tiranës, ato kanë datën e tyre”, u shpreh Gonxhja.
Përtej dilemës për bashkinë e kryeqytetit, Gonxhja dhe kolegët socialistë pritet të kalojnë një verë në pritje dhe pasiguri, deri në momentin kur Kryeministri Edi Rama të marrë vendimet për rikonfigurimin e kabinetit qeveritar dhe strukturës politike për fazën e ardhshme.
“Vera do të jetë e nxehtë, pasi stina është e nxehtë, por nuk ka asnjë rëndësi se sa keq do t’i bëjë vapa kujtdo, pra personit individualisht, pasi këtu rëndësi ka objektivi kryesor, ai që kishim në kokë: integrimi i Shqipërisë. Pjesa individuale është shumë relative dhe nuk besoj se do të më shqetësonte”, theksoi ai.
Ndërkohë, përveç situatës në Tiranë, Partia Socialiste ka nisur përgatitjet për zgjedhjet e parakohshme vendore në të paktën tre bashki: Mat, Berat dhe Tepelenë, ku në vjeshtë pritet të nisë fushata elektorale.
