Kreu i Prokurorisë së Posaçme, Altin Dumani, ka dhënë detaje të reja mbi hetimet në lidhje me procesin zgjedhor, gjatë një aktiviteti publik me temë “Përtej monitorimit: Drejt një reformë zgjedhore gjithëpërfshirëse për integritetin e zgjedhjeve në Shqipëri”. Ai konfirmoi se janë ushtruar një sërë kontrollesh në banesa, zyra dhe mbi persona të ndryshëm, duke sekuestruar prova dhe dokumente të rëndësishme që do t’i shërbejnë hetimit.
Sipas Dumanit, janë ekzekutuar 20 vendime gjykate për kontrolle, çka tregon për një angazhim serioz të strukturës së posaçme ndaj manipulimit të votës dhe abuzimeve zgjedhore. Por ai theksoi se përballen me sfida të shumta, përfshirë edhe kallëzimet e paplota të dorëzuara nga subjektet politike.
“Sfidat nuk janë të pakta. Kallëzimet e partive politike në SPAK kanë qenë të paplota dhe jo gjithmonë të mbështetura në prova konkrete. Nevojitet më shumë ndërgjegjësim publik dhe mbështetje për denoncime përmes fushatave informuese dhe garancive për mbrojtjen e dëshmitarëve”, tha Dumani.
Në event ishin të pranishëm edhe Kryekomisioneri Ilirjan Celibashi, ambasadori britanik Nick Abbott dhe drejtori i Policisë së Shtetit, Ilir Proda.
Celibashi nga ana e tij kërkoi që puna për një reformë të thellë zgjedhore të nisë sa më parë. Ai pranoi se ndonëse ka pasur progres në administrimin e zgjedhjeve, problematikat e evidentuara nga raporti paraprak i OSBE/ODIHR nuk mund të anashkalohen.
“Rama dhe Berisha zhvilluan një fushatë të ashpër, të mbushur me sulme personale. Reforma zgjedhore duhet të synojë integritetin e procesit dhe barazinë e pjesëmarrjes”, deklaroi Celibashi.
