Ndërkohë që qyteti i Elbasanit vazhdon të jetë i mbuluar nga reja e dendur e tymit toksik të landfillit që digjet prej më shumë se 15 orësh, kryeministri Edi Rama zhvilloi sot një takim në Cërrik me fokus bujqësinë, ku kritikoi kryebashkiakët e qarkut se janë shkëputur nga fshati dhe nuk po e shohin zhvillimin rural si pjesë të përgjegjësive të tyre.
Rama tha se pas reformës territoriale, vëmendja ndaj fshatit është reduktuar vetëm në çështje infrastrukturore, ndërsa zhvillimi i sipërmarrjeve bujqësore ka mbetur në vendnumëro. Ai kërkoi një “kthesë” në këtë qasje, duke theksuar mungesën e bashkëpunimit real mes fermerëve, sipërmarrësve dhe pushtetit vendor.
Në këtë takim, Rama bëri të ditur edhe një linjë të re kredie prej 250 milionë eurosh për mbështetjen e projekteve bujqësore dhe rurale, por paralajmëroi se pa ndryshim të qasjes së bashkive, edhe këto fonde mund të mos japin efekt.
Ndërkohë, tymi i landfillit të Elbasanit, i favorizuar nga era, është zhvendosur deri në qytetin e Cërrikut, ku zhvillohej takimi, duke theksuar paradoksin mes emergjencave mjedisore që përjetojnë qytetarët dhe përpjekjeve për zhvillim bujqësor në zonë
