Kryetarja e Parlamentit të Shqipërisë, Elisa Spiropali, u caktua sot kryetare e ceremonisë për 1-vjetorin e ndarjes nga jeta të shkrimtarit Ismail Kadare.
Bashkëshortja e shkrimtarit, Elena, foli shkurt, ndërsa në panel qëndroi mes Skënder Gjinushit dhe Elisa Spiropalit. Kjo e fundit mbajti një fjalim të gjatë, të shkruar enkas për këtë rast, ku fjalitë e stërholluara dhe pa kripë kishin shijen e tallashit. Nuk munguan as sulmet ndaj kritikëve të Kadaresë.
“Fitimtar, kur mund të kthente përgjigje, tani në heshtje u dha paqe, duke lënë pas indiferencën dhe moskuptimin të gjithë atyre që iu gërmushëm, gafurrën dhe e gërvishën me gërvima groteske nën gërmërin qesharak të marshit funebër të mediokërve. Herët a vonë, ndodh revanshi i shkrimtarit, sidomos atëherë kur ai nuk ka trup për të mbajtur mbi emër, por është vetëm një emërmbiemër mbi letërsinë e tij të shkruar,” – deklaroi Spiropali, duke harruar ndoshta që jeta personale e shkrimtarit nuk ndahet me thikë nga jeta publike dhe letrare. Kritikët, pashmangshëm, do të ekzistojnë.
Letërsia e bllokut komunist ka njohur edhe shkrimtarë të tjerë të mëdhenj si Milan Kundera, i cili, ndonëse i kritikuar për disa qëndrime ndaj komunizmit, la porosi që ceremonitë në nder të tij të ishin modeste dhe private. Kjo si për t’i kujtuar botës dhe viktimave të regjimeve komuniste se dritë-hijet e shkrimtarëve të mëdhenj të asaj periudhe kanë nevojë për kohë dhe hapësirë që të ndajnë dritën nga hijet. Lavdet dhe ceremonitë e tepërta, përkundrazi, nuk ndihmojnë në këtë proces të rëndësishëm për një shkrimtar të madh.
