Pasi nuk arriti që të merrte më shumë se një deputetë në zgjedhjet e 11 majit, kreu i “Shqipëria Bëhet” , Adriatik Lapaj, ka shpallur nismën tjetër për t’i bindur shqiptarët për forcën e tij politike. Në një postim në facebook, Lapaj shprehet se do të jetë në çdo cep të Shqipërisë e për të takuar cilindo që dëshiron të pijë një kafe me të apo dhe ta ftojë në shtëpi për të ndarë një kafshatë bukë.
Ai u bën thirrje shqiptarëve që t’i shkruajnë mesazh në rrjetet sociale dhe të takohen qoftë për një bisedë, për një kafë apo dhe në vendin e punës, për të ndarë problemet dhe vështirësitë e jetës së përditshme.
“Do vijmë te ty! Çdo ditë do të jetë një rrugëtim për të takuar secilin prej jush, kudo ku jetoni, në çdo cep të atdheut. Do të udhëtoj për të qenë pranë kujtdo që më fton. Diku do takoj një njeri, diku dy, tre, katër a pesë. Diku do pimë një kafe. Kur të më ftoni në shtëpi, do ndajmë edhe një kafshatë bukë. Diku do takohemi në vendin tënd të punës, ku do të më tregosh si e fiton jetesën dhe me çfarë vështirësish përballesh. E diku tjetër, gjatë rrugës, do kuvendojmë në odat e traditës. Dua të mësoj nga ju çdo problem që përballeni, dhe t’i jap zë sa më shumë të mundem”, shkruan Adriatik Lapaj.
Nuk dihet se sa do të shërbejë kjo metodë për t’iu imponuar shqiptarëve idenë se forca politike që ka krijuar është ndryshe nga të tjerat, por duhet thënë se ajo e retorikës populiste qartazi i dështim duke qenë se nuk arriti të siguronte më shumë se një deputet. Urojmë që me idenë e re do ketë më shumë sukses, sepse në të kundërt, do jetë asgjë më pak sesa emisioni “Histori Shqiptare” i gazetares Alma Çupi.
