Edhe pse nuk u paraqit në seancën e parë gjyqësore ndaj tij dhe dhëndrit të tij, për çështjen "Partizani", ish kryeministri Sali Berisha ka reaguar në "Facebook". Në një status të gjatë, Berisha e cilëson procesin si një farsë të pastër politike dhe të diktuar nga mazhoranca në pushtet. Ai shkruan se kapja dhe përdorimi i drejtësisë si armë politike është tipar kryesor i regjimeve autokratike të korruptuara. Qyshse në nisje të reagimit të tij, kreu i selisë blu thotë se procedimin penal ka nisur në kongresin e PS në Prill 2022 drejtuar SPAK, prokurorët e nënshtruar dërguan 16 kërkesa brenda muajit duke nisur hetim 30 vjeçar shtrirë në 3 breza ndaj Sali Berishës deri tek mbesat e palindura të tij.
Ai thotë se akuzat janë ngritur mbi kallëzimin e rremë të Taulant Ballës dhe mohon që toka në fjalë të ketë qenë ndonjëherë publike, duke pretenduar se dokumentet zyrtare provojnë të kundërtën. Sipas Berishës:
Nuk ka dëshmi që Jamarbër Malltezi ka përfituar tokë publike;
S’ka dëm ekonomik ndaj shtetit dhe nuk ka asnjë akt zyrtar që implikon Berishën;
Hetimet nuk kanë gjetur asnjë provë për veprim të paligjshëm të zyrtarëve apo ndërhyrje nga ana e tij.
Ai e quan hetimin një “veting politik” 30-vjeçar, duke ironizuar se pas pesë vitesh kontroll, prokuroria gjeti vetëm kursime modeste dhe një apartament më të madh se në kohën e diktaturës. Akuzat për korrupsion pasiv, sipas tij, bazohen në ndihma familjare dhe bamirësi që i konsideron të padrejta.
Në fund, Berisha akuzon SPAK për heshtje ndaj korrupsionit të kryeministrit Rama dhe paralajmëron se drejtësia e vërtetë do të vijë.
