Kryeministri Edi Rama ka reaguar sërish ndaj deklaratave të fundit të liderit të ekstremit të djathtë në Britaninë e Madhe, Nigel Farage, i cili kërkoi që të gjithë shqiptarët e burgosur në Britani të kthehen në Shqipëri.
Në një postim në rrjetet sociale, Rama e ka akuzuar Farage për manipulim të shifrave dhe retorikë djallëzore, duke e ironizuar me një shprehje latine që ia kujtonte gjyshja:
“Errare humanum est, sed perseverare diabolicum” – Të gabosh është njerëzore, por të këmbëngulësh në gabim është djallëzore.
“Në vend që të shqetësoni Sekretaren e Brendshme, ndoshta më mirë më thoni mua kur mund t’ju pres në Tiranë si i ftuar nderi.
Sepse, i dashur Nigel, duket se numrat nuk janë pika juaj e fortë. Le t’i bëjmë gjërat të qarta: JU HUMBËT”, shkruan Rama.
Ai shton se Farage po përdor shqiptarët si kokë turku për agjendën e tij politike, duke iu referuar si “teatër politik post-Brexit”.
“Ju pretendoni se janë 53,000 shqiptarë në Britani. Në fakt, janë shumë më tepër. Vetë ‘The Telegraph’, burimi juaj, ka pranuar se analiza është e cunguar dhe popullsia shqiptare mund të arrijë deri në 140,000 – çka do të thotë se më pak se 1 në 100 janë në burg”, shkruan Rama.
Ai theksoi gjithashtu se pjesa dërrmuese e shqiptarëve janë kontribues të ndershëm në shoqërinë britanike, ndërsa bashkëpunimi mes dy qeverive ka sjellë rezultate konkrete në luftën ndaj emigracionit të paligjshëm dhe krimit.
“Kjo quhet bashkëpunim. Por ‘një në 50 shqiptarë në burg’? Kjo nuk është fakt, kjo quhet delir post-Brexit.”
Reagimi i Ramës erdhi pas një postimi të bërë më herët nga Nigel Farage, ku ai riktheu sulmet ndaj komunitetit shqiptar në Mbretërinë e Bashkuar.
“Janë 53,000 shtetas shqiptarë në Britani dhe 1,099 prej tyre ndodhen në burgjet tona.
Kjo do të thotë 1 në 48. Do t’i kërkoj Sekretares së Brendshme të organizojë kthimin e të gjithë këtyre të burgosurve në Shqipëri.
Faleminderit për bashkëpunimin tuaj”, shkruante Farage në platformën X.
