Vijon debati online mes kryeministrit Edi Rama dhe liderit të partisë së ekstremit të djathtë në Britaninë e Madhe, Nigel Farage. Ky i fundit i është përgjigjur sot Ramës me një postim në X, ku i kujton numrin e saktë të të burgosurve shqiptarë në Britaninë e Madhe.
“Janë 53,000 shtetas shqiptarë në Mbretërinë e Bashkuar dhe 1,099 prej tyre ndodhen në burgjet tona. Kjo do të thotë 1 në 48.
Do t’i kërkoj Sekretares së Brendshme të organizojë kthimin e të gjithë këtyre të burgosurve në Shqipëri.
Faleminderit për bashkëpunimin tuaj,” shkruan Farage, i cili së fundmi, sipas sondazheve, ka rritur ndjeshëm numrin e përkrahësve në Britani.
Fokusi kryesor i programit të tij politik mbetet lufta kundër emigracionit të çdo lloji, një temë që vazhdon të tërheqë mbështetës në rritje, veçanërisht mes votuesve të zhgënjyer nga politika tradicionale.
