Procesi i rinumërimit të votave në Qarkun e Fierit, i kërkuar nga koalicioni “Nisma Shqipëria Bëhet”, ka nxjerrë në pah parregullsi serioze në numërimin fillestar, por deri tani nuk ka ndryshuar përbërjen e mandateve të dala nga zgjedhjet e 11 majit.
Pretendimet kryesore lidheshin me mandatin e Zegjine Çaushit të PS-së, për të cilin opozita kërkoi hetim të thelluar. Nga 428 kuti të rinumëruara deri më tani (nga gjithsej 587), rezulton se Partia Socialiste ka fituar rreth 15 vota shtesë, ndërsa Partia Demokratike ka humbur afro 107 vota.
Megjithatë, shifrat tregojnë tjetërsime të dukshme votash në favor të disa kandidatëve. Ceno Klosi (PS) ka rezultuar me 921 vota më shumë, të dyshuara si të tjetërsuara nga votat e kandidatëve të tjerë të së njëjtës parti. Konkretisht, Klevis Jahajt i mungojnë 454 vota, ndërsa Antoneta Dhimës 92 vota. Edhe Zegjine Çaushit i rezultojnë të mungojnë 63 vota, sipas verifikimeve në kuti.
Nga ana e Partisë Demokratike, kandidatja Silva Hasaj, e cila nuk siguroi mandat deputeti, ka dalë me rreth 670 vota më pak në kuti sesa shënohej në dokumentacion. Kjo e rendit atë si kandidatin me numrin më të lartë të votave të manipuluara në PD.
Ndër kandidatët e tjerë demokratë me parregullsi janë edhe Gentian Çela, që ka rezultuar me 215 vota më shumë, dhe Ajet Gurguri, me 92 vota të dyshuara si të tjetërsuara nga kolegë të së njëjtës parti.
Ndërsa rinumërimi po i afrohet fundit, mbetet për t’u parë nëse Komisioni Qendror i Zgjedhjeve do të marrë masa ligjore ndaj komisionerëve të përfshirë në manipulimet që kanë sjellë diferenca të ndjeshme mes votave reale dhe atyre të raportuara.
