Rinumërimi i votave në qarkun e Fierit ka shtuar numrin e votave për kandidaten e Partisë Demokratike, Silva Hasaj. Anëtari i Komisionit të Ankimimeve dhe Sanksioneve, Ledio Braho, ka shprehur shqetësim për këtë situatë, pasi vetëm në dy bashkitë Lushnjë dhe Divjakë, Hasaj ka fituar 586 vota shtesë.
Braho deklaroi se në disa qendra votimi janë konstatuar lëvizje të votave me mbi 15-20 vota, duke theksuar se kjo kërkon verifikime të mëtejshme.
“Duke u bazuar në këto shifra, në disa qendra votimi ka pasur ndryshime me mbi 15-20 vota. Ne do ta diskutojmë këtë si KAS sapo përfundojë procesi i rinumërimit për qarkun e Fier. Nga statistikat, besoj se mund të kërkojmë nga Komisioneri që të ndërmarrë veprime për të verifikuar situatën, duke hapur kutitë me materialet zgjedhore dhe duke kontrolluar numëruesit. Do të shohim se si do të vijojë procesi,” tha Braho.
Ai shtoi gjithashtu se nëse konstatohet se këto lëvizje janë kryer nga të njëjtat grupe, mund të kemi të bëjmë me vepër penale, dhe do të ketë bazë për kallëzim penal. Ndërsa për ndryshimet minimale, me 1-2 vota, situata mund të trajtohet me sanksione administrative sipas vendimmarrjes së KQZ-së dhe KAS-it.
Kërkesa për rinumërim në Fier u bë nga subjekti “Shqipëria Bëhet” i Adriatik Lapajt, dhe u miratua pasi u mbështet nga përfaqësuesit e PD në KAS. Gazmend Bardhi e mbrojti këtë vendim si një akt që respekton të drejtat e të gjithë palëve. Kujtojmë se Adriatik Lapaj nuk kishte numërues në Fier, ndërsa PD kishte.
Nëse pas verifikimit të KAS-it rezulton se rreth 600 votat shtesë të kandidates demokrate janë manipuluar, ato mund të shpallen të pavlefshme dhe t’i hiqen PD-së. Në atë rast, shanset janë që mandatin në Fier t’i kalojë partisë “Shqipëria Bëhet”.
Kjo situatë mund të shihet edhe si një dhuratë e Gazmend Bardhit dhe PD-së për Adriatik Lapajn, pasi me firmën për rinumërim, ata rrezikojnë t’i heqin vetes një mandat për t’ia dhënë partisë “Shqipëria Bëhet”.
