Përmes një letre të hapur, Shqiponja Veliaj, nëna e kryebashkiakut të Tiranës, Erion Veliaj, ka shprehur shqetësimin e thellë për ndalimin e të birit, i cili prej më shumë se katër muajsh ndodhet në paraburgim, sipas saj, pa asnjë akuzë të ngritur zyrtarisht dhe në kundërshtim me të drejtat themelore që garanton Kushtetuta dhe Konventa Evropiane e të Drejtave të Njeriut.
“Familja ime është përfshirë në një makth kafkian,” shkruan ajo, duke përshkruar arrestimin e befasishëm të Erion Veliajt në muajin shkurt nga SPAK, institucioni i pavarur antikorrupsion. “Djali im, tre herë i zgjedhur nga qytetarët si kryetar bashkie, u ndalua në bazë të një denoncimi anonim nga një individ fiktiv, thuajse dy vjet më parë – një akuzë të cilën ai e mohon kategorikisht.”
Në letrën e saj, Veliaj ngre shqetësime serioze për mënyrën sesi po funksionon drejtësia në vend, veçanërisht kur bëhet fjalë për figura të njohura publike.
“Askush nuk duhet të jetë mbi ligjin, as djali im,” shprehet Veliaj, “por po ashtu, askush nuk duhet të mbahet i ndaluar pa akuza, pa proces të rregullt ligjor, pa transparencë apo pa qasje në mbrojtjen ligjore.”
Letra, e cila mbart një ton emocional, thekson gjithashtu shqetësimin për standardet e drejtësisë në Shqipëri në një moment kyç për të ardhmen evropiane të vendit. Ajo sjell në vëmendje dhe raste të tjera të ngjashme, si ai i Thoma Gellcit, për të cilin Gjykata Evropiane e të Drejtave të Njeriut vendosi se paraburgimi i tij ishte i paligjshëm, dhe vë në pah faktin se përqindja e të paraburgosurve në Shqipëri është dukshëm më e lartë se mesatarja evropiane.
“Në Shqipëri, të fusin fillimisht në burg dhe pastaj mbledhin provat,” citon ajo avokatin e njohur Dorian Matlia, duke kritikuar atë që e cilëson si një prirje të sistemit për të justifikuar me çdo kusht ndalimet e bëra pa bazë të fortë ligjore.
Letra përmbyllet me një thirrje të fortë për drejtësi, jo vetëm për të birin, por për të gjithë ata që përballen me një sistem që shpesh vepron me masa ekstreme para se të ketë prova të mjaftueshme.
“Kjo nuk ka të bëjë me mbrojtjen e djalit tim nga përgjegjësia, por me mbrojtjen e parimeve që garantojnë demokracinë: prezumimi i pafajësisë, e drejta për liri, dhe procesi i rregullt ligjor,” shkruan ajo. “Si qytetare shqiptare, dua ta shoh vendin tim duke vepruar drejt ndaj të gjithë njerëzve të tij. Si nëna e Erionit, dua të di që ai do të trajtohet me dinjitet.”
Kryebashkiaku i Tiranës, Erion Veliaj, po mbahet në paraburgim me urdhër të SPAK dhe masë të GJKKO-së prej gati pesë muajsh me akuzën e korrupsionit.
