Kryetari i Partisë Demokratike, Sali Berisha, po merr pjesë në punimet e Asamblesë Parlamentare të OSBE-së në Porto të Portugalisë. Në krye të delegacionit të opozitës, Berisha ka folur për dramën e shpopullimit të Shqipërisë dhe narkodiktaturën që, sipas tij, ka kapluar ekonominë.
“Shqipëria ka pasur zhvillimet më dramatike në periudhën 2014–2024. Gjatë kësaj kohe, kombi im ka humbur më shumë njerëz sesa çdo komb tjetër, madje edhe nga vendet në luftë apo konflikte civile rajonale ose botërore,” tha Berisha.
Ai shtoi se 45% e shqiptarëve kanë lënë vendin gjatë këtyre 10 viteve. Sipas Eurostat, 1 milion e 99 mijë shqiptarë janë larguar drejt vendeve të zonës Shengen, pa përfshirë ata që janë larguar drejt vendeve të tjera.
Berisha theksoi se OKB-ja njoftoi se Shqipëria është vendi me rënien më të madhe të lindshmërisë në botë, si pasojë e emigracionit. “Statistikat tregojnë se shkalla e lindshmërisë sot është aty ku ishte para 100 vitesh,” u shpreh ai.
Kreu i PD-së akuzoi qeverinë për “narkodiktaturë”, duke e cilësuar Shqipërinë si “narkodiktaturën e parë dhe të vetme në Europë”.
