Kreu i Prokurorisë së Posaçme (SPAK), Altin Dumani, ka deklaruar se institucionit që ai drejton po zbaton rekomandimet e ardhura nga qeveria dhe institucionet e tjera për forcimin e luftës kundër krimit të organizuar dhe korrupsionit. Megjithatë, ai ka ngritur shqetësimin se shumë prej këtyre rekomandimeve nuk janë të mbështetura në të dhëna statistikore apo analiza të detajuara, duke vështirësuar zbatimin e tyre në praktikë.
“Ndonëse rekomandimet janë të mirëpritura në parim, mungesa e konkretizimit dhe mungesa e një baze statistikore e bën të vështirë implementimin e tyre në punën e përditshme të SPAK,” – u shpreh Dumani.
Sipas tij, disa rekomandime janë të formuluara në mënyrë të përgjithshme dhe shpeshherë duken subjektive, çka i pengon prokurorët të ndërmarrin hapa të qartë në zbatim. “Ka raste kur rekomandimet mbeten thjesht deklarative, pa pasur ndikim real në terren,” theksoi kreu i SPAK.
Dumani bëri thirrje për një qasje më të strukturuar dhe të bazuar në fakte konkrete, në mënyrë që sugjerimet dhe rekomandimet të kthehen në instrumente të dobishme për luftën efektive ndaj paligjshmërisë.
Ai përsëriti se institucionet si SPAK janë të gatshme të bashkëpunojnë dhe të marrin në konsideratë çdo sugjerim, por kërkoi që ato të jenë të qarta, të matshme dhe të bazuara në analizë të thelluar për të qenë realisht të zbatueshme.
