Maricarmen Abascal, 87-vjeçarja spanjolle që u bë simbol i krizës së strehimit pas dëbimit nga banesa ku kishte jetuar për më shumë se shtatë dekada, ka ndërruar jetë.
Abascal u nxor nga apartamenti i saj më 23 shtator, pasi nuk ishte në gjendje të përballonte rritjen e qirasë. Sipas të dhënave të bëra publike, qiraja ishte rritur nga 500 në 2,650 euro në muaj, përpara se të ulej në 1,650 euro, shumë që përsëri tejkalonte pensionin e saj.
Pamjet e 87-vjeçares duke u larguar nga banesa mbi një barelë shkaktuan reagime të forta dhe rasti i saj u kthye në simbol të debatit mbi rritjen e kostove të banimit dhe mbrojtjen e qiramarrësve në Spanjë.
Pas dëbimit, kompania pronare e apartamentit ofroi rikthimin e saj me një qira më të ulët, por marrëveshja nuk u finalizua pasi Abascal ishte shtruar në spital.
Sindikata e Qiramarrësve të Madridit njoftoi vdekjen e saj, duke deklaruar se zgjidhja për rikthimin në banesë kishte ardhur tepër vonë. Pas lajmit, protestues u mblodhën në Puerta del Sol të Madridit, ndërsa kryeministri spanjoll Pedro Sánchez shprehu ngushëllimet për familjen e 87-vjeçares.
