Në politikë ku zakonisht dominon përvoja dhe emrat e njohur, zgjedhjet e fundit parlamentare sollën një surprizë, Sara Mila, një emër i panjohur për publikun deri para një muaji, u rendit si deputetja më e votuar e Partisë Socialiste. Një rezultat që ka hapur diskutime dhe kuriozitet mbi profilin, mbështetjen dhe rrugëtimin e saj politik.
E re në moshë dhe pa një histori kontributesh publike apo politike, Sara Mila me 7000 ndjekës në facebook, arriti të merte një numër të lartë votash preferenciale prej 18.600, që i tejkaloi shumë prej figurave të njohura të PS.
Mungesa e karrierës politike apo publike dhe votat e shumta që ka marrë e kanë vendosur atë në qendër të vëmendjes, sidomos pasi kreu i PD, Sali Berisha e akuzoi se mbështetet nga Suel Çela, një drejtues i krimit të organizuar në Elbasan, i shpallur në kërkim për një listë të gjatë veprash penale.
Ndërsa gazetarja Klodiana Lala në emisionin "Të Paekspozuarit", deklaroi se rasti i Sara Milas është i çuditshëm, pasi një person i panjohur është renditur e para me një numër të lartë votash. Lala tha se i takon SPAK të provojë nëse Mila ka sponsorë nga krimi i organizuar, konkretisht nga grupi i Suel Çelës.
“Krimi ka patur ndikim e vet. Në Elbasan, Sara Mila është një zonjë pa asnjë kontribut publik, por rezulton gruaja më e votuar në qarkun e Elbasanit. Si ka mundësi një grua që nuk njihej nga 90% e qytetarëve?
Po të flasësh me qytetarë në Elbasan apo Librazhd, ata të tregojnë dhe të thonë, jo vetëm mua si gazetare, por edhe të BIRN, ku qytetarët orientoheshin për të votuar këtë zonjë. Fakti që nuk kishte kontribut publik dhe rezulton më e votuara, kjo ngre dyshime që krimi i organizuar ka ndikuar. Dyshohet se ka patur ndikim grupi i Suel Çelës, këtë mbetet ta provojë SPAK. Zonja mund të dalë të japë reagimin e vet. Po të bisedosh me qytetarët, ishin orientuar drejt kësaj zonje. Ka me kontribut shumë të çmuar brenda PS, që nuk kanë marrë vota” – tha Lala.
Sa i përketë karrierës së saj, Mila ka filluar të punojë në moshën 24-vjeçare në Drejtorinë e Shërbimeve Qeveritare pranë Kryeministrisë dhe në vitin 2022 u emërua drejtoreshë e njërit prej sektorëve të Shërbimit Social Shtetëror, të dyja punë të nivelit teknik.
Përtej karrierës si nëpunëse, ajo është vajza e një biznesmeni me aksione në dy kompani tregtie me qendër në Tiranë si dhe bashkëshorte e pronarit të një fabrike të përpunimit të aluminit.
