Ka përfunduar numërimi i votave preferenciale në qarkun e Tiranës, ku gara më e ngushtë është mes dy figurave të njohura të Partisë Socialiste. Ish-ministrja Olta Xhaçka ka dalë përpara Blerina Gjylametit me një diferencë minimale prej vetëm dy votash, 5806 për Xhaçkën dhe 5804 për Gjylametin. Megjithatë, rezultati ende nuk është përfundimtar, pasi pritet numërimi i votave të ardhura nga diaspora, të cilat mund të ndikojnë në renditjen përfundimtare.
Disa figura të njohura të Partisë Socialiste nuk kanë arritur të sigurojnë një mandat. Ndër ta janë Pandeli Majko, Mimi Kodheli dhe Xhemal Qefalia, të cilët konsiderohen prej kohësh si pjesë e "gardës së vjetër" të PS. Jashtë Parlamentit kanë mbetur gjithashtu Toni Gogu, Ermonela Felaj, Etilda Gjonaj, Klotilda Bushka dhe Plarent Ndreca.
Ndërkohë, kandidati më i votuar në listën e hapur të PS në Tiranë është Blendi Gonxhja me 22,398 vota. Pas tij renditen Erion Braçe me 21,364 vota dhe ministri i Brendshëm, Ervin Hoxha, me 19,113 vota. Fatmir Xhafaj ka marrë 12,677 vota, ndërsa Ornaldo Rakipi dhe Anila Denaj kanë marrë përkatësisht 9,683 dhe 8,783 vota.
