Pavarësisht se mori 17.500 vota në listën e hapur të Partisë Demokratike në qarkun e Tiranës, mjeku Ilir Alimehmeti mbeti jashtë Parlamentit. Në një intervistë për “Dita Jonë” në A2 CNN, ai i atribuon këtë rezultat sistemit elektoral aktual, të cilin e cilëson si të dështuar dhe të dëmshëm për demokracinë përfaqësuese.
“Problemi më i madh është se gara nuk është mes nesh dhe kundërshtarit politik, por brenda listës. Kjo nuk është garë idesh, por përplasje mes njerëzve të së njëjtës parti. Ky sistem nuk e lidh më deputetin me qytetarin. Unë jam për rikthimin e sistemit mazhoritar që kishim 20 vite më parë”, – u shpreh Alimehmeti.
Ai e konsideron sistemin aktual si shkakun kryesor të dobësimit të parlamentit dhe përfaqësimit politik, duke shtuar se pasojat ndihen edhe te largimi masiv i të rinjve dhe plakja e kombit.
“Po vazhduam kështu, fëmijët do t’i shohim vetëm me WhatsApp, dhe nipat e mbesat do na rriten në rrugët e Europës. Kombi plaket, njerëzit largohen, lindjet bien, dhe politika mendon vetëm për vetveten”, – tha ai.
Në lidhje me përjashtimin nga Kuvendi, Alimehmeti theksoi se nuk kërkon mandat nga listat e mbyllura, por vetëm nga qytetarët.
“Unë nuk lyp mandat. Ligji është ligj, edhe pse e kundërshtoj. E vetmja mundësi ishte lista e hapur, unë i jam drejtuar vetëm njerëzve dhe besoj te demokracia nga poshtë”.
Sa i përket analizës brenda PD-së pas rezultatit të zgjedhjeve, ai tha se fjalën e fundit do ta ketë Këshilli Kombëtar, ndërsa vetë po përgatit një analizë të detajuar me stafin e tij.
“Procesi nuk ka përfunduar. Unë bëj analizën në nivel mikroskopik, i takon kryesisë dhe kryetarit të bëjnë atë makroskopike. Marrëdhënia ime me kryetarin e PD është profesionale”.
Për ata kandidatë të PD-së që nuk u angazhuan në fushatë, Alimehmeti nuk i kurseu kritikat:
“Për disa kandidatë ishte dhuratë, për disa punë. Unë vij nga një botë ku gjërat fitohen me punë. Kushdo që punon e sheh veten në pasqyrë dhe e di nëse ka dhënë maksimumin”.
I pyetur nëse do të kandidonte për kryebashkiak të Tiranës në rast zgjedhjesh të parakohshme, Alimehmeti nuk e përjashtoi mundësinë:
“Demokracia vjen nga poshtë. Nëse do ketë nevojë, mekanizmat ekzistojnë. Por kjo nuk është ende koha e duhur. Unë jam lojtar ekipi – nuk ishte terreni për të kandiduar në Tiranë, por kemi bërë gola në Durrës dhe Fier”.
