Të martën, më datë 29 shtator, Gjykata Kushtetuese do të shqyrtojë çështjen e ish-deputetit demokrat Ervin Salianji. Ish-ligjvënësi u dënua me 1 vit burgim për të ashtuquajturën çështja Babale, pasi sipas prokurorisë krijoi prova të rreme për Geron Xhafajn, vëllain e ish-ministrit të Brendshëm Fatmir Xhafaj. Ndërsa për 5 vite iu hoq e drejta për të ushtruar funksione publike. Salianji humbi mandatin, ndërsa iu hoq e drejta për të garuar në zgjedhjet parlamentare. Ish-deputeti e kundërshton akuzën dhe e ka konsideruar me prapavijë dënimin. Kushtetuesja do të shqyrtojë çështjen e tij të martën e ardhshme, gjatë një seance mbi bazë dokumentash. Vendimi pritet me mjaft interes, nisur dhe nga fakti se pas daljes nga burgu Salianji bëri një përpjekje për të marrë drejtimin e PD-së dhe u përball me akuza të forta nga Sali Berisha, që më herët e kishte konsideruar si të “dënuar politik”. Për çështjen Babale është dënuar dhe Albert Veliu, i njohur si Babalja dhe Fredi Alizoti që pretendohet se imitoi zërin e Geron Xhafajt në një audiopërgjim që u publikua më vonë nga selia e PD-së. Pas denoncimit, Geron Xhafaj u dorëzua në Itali për të vuajtur një dënim për çështje droge, ndërsa akuzat për përfshirje sërish në trafik në Shqipëri nuk u finalizuan. Opozita ka akuzuar gjithmonë Fatmir Xhafajn se për shkak të pozicionit si Ministër i Brendshëm ka përdorur strukturat vartëse për të penguar hetimin ndaj vëllait.
