Sandër Simoni do të jetë një nga tre anëtarët e rinj të Këshillit të Lartë Gjyqësor (KLGJ), pas votimit të zhvilluar këtë të premte në Mbledhjen e Përgjithshme të Gjyqtarëve.
Simoni u zgjodh si përfaqësues i Gjykatës së Lartë në KLGJ, ndërsa gara u vendos vetëm përmes shortit, pasi numërimi i votave prodhoi një rezultat të barabartë mes dy kandidatëve.
Në votimin ku morën pjesë gjyqtarët e thirrur në Mbledhjen e Përgjithshme, të dy kandidatët për përfaqësuesin e Gjykatës së Lartë morën nga 179 vota.
Për shkak të barazimit 179 me 179, u zbatua procedura e parashikuar në rregullore, sipas së cilës fituesi në një rast të tillë përcaktohet me short.
Shorti u hodh me gogla dhe në përfundim të tij emri i përzgjedhur ishte ai i Sandër Simonit, duke i dhënë atij mandatin si anëtar i ri i KLGJ-së.
Procesi për zgjedhjen e anëtarëve të rinj të Këshillit të Lartë Gjyqësor vijon. Pas përfundimit të garës për përfaqësuesin e Gjykatës së Lartë, ka nisur numërimi i votave për kandidatët që vijnë nga Gjykatat e Apelit.
Mbledhja e Përgjithshme e 353 gjyqtarëve do të zgjedhë tre anëtarë të rinj të KLGJ-së, nga një për secilin nivel të gjyqësorit, Gjykata e Lartë, Gjykatat e apelit dhe Gjykatat e shkallës së parë.
