Mançester Siti përballet me një prej momenteve më të vështira të epokës së tij të suksesshme, pasi një komision i pavarur raportohet se e ka gjetur klubin fajtor për 114 nga 115 akuzat e ngritura nga Premier League për shkelje të rregullave financiare.
Lajmi është raportuar fillimisht nga David Ornstein i “The Athletic” dhe është konfirmuar nga disa media ndërkombëtare. Megjithatë, Premier League ka deklaruar se procesi mbetet në vijim dhe është subjekt i konfidencialitetit, ndërsa Mançester Siti pritet të apelojë.
Akuzat lidhen me periudhën 2009-2018 dhe përfshijnë pretendime për mosdhënie të informacionit të saktë financiar, pagesat e lojtarëve dhe trajnerëve, rregullat e qëndrueshmërisë financiare të Premier League dhe rregulloret e UEFA-s. Klubi anglez i ka mohuar vazhdimisht akuzat.
Tashmë vëmendja është zhvendosur te sanksioni. Komisioni ende nuk ka përcaktuar dënimin dhe në tavolinë mund të jenë disa masa, nga gjobat financiare deri te zbritja e pikëve dhe sanksione të tjera sportive. Përjashtimi nga Premier League është përmendur gjithashtu si një prej masave që rregullorja mund të lejojë, megjithëse asnjë dënim i tillë nuk është vendosur deri tani.
Situatën po e ndjekin nga afër edhe klubet e mëdha europiane. Sipas “SPORT”, Real Madridi është mes skuadrave që po monitorojnë zhvillimet, pasi një sanksion i rëndë ndaj Cityt mund të ndikojë në të ardhmen e disa prej lojtarëve të skuadrës së Mançesterit.
Në qendër të vëmendjes është Erling Haaland. Sulmuesi norvegjez ka qenë prej kohësh i lidhur me Real Madridin, megjithëse kontrata e tij afatgjatë me Cityn dhe situata aktuale në sulmin e madrilenëve e bëjnë një transferim të tillë të komplikuar.
Edhe Rayan Cherki dhe Josko Gvardiol janë emra që më parë kanë qenë në radarët e klubit spanjoll. Gvardiol, ndërkohë, ka rinovuar së fundmi kontratën me Mançester Sitin deri në vitin 2031.
Një tjetër repart që mund të bëhet interesant për Real Madridin është mesfusha. Sipas raportimeve të mediave spanjolle, disa prej lojtarëve të afruar nga City gjatë merkatos së fundit kanë qenë më parë në vëmendjen e klubit madrilen.
Megjithatë, për momentin nuk ka asnjë garanci se situata juridike do të sjellë largime nga Etihad. Procesi pritet të vazhdojë me apelimin e mundshëm të Mançester Sitit dhe mund të zgjasë për një periudhë të gjatë.
Nëse sanksionet do të rezultonin të rënda, merkatoja mund të ndryshonte ndjeshëm për klubin anglez. Dhe në këtë skenar, Real Madridi do të jetë një prej klubeve që do ta monitorojë nga afër situatën.
