Diçka po lëviz sërish rreth Saimir Tahirit. Pas viteve të heshtjes dhe një profili pothuajse të zhdukur nga skena politike, ish-ministri i Brendshëm ka zgjedhur pikërisht këtë moment për të paralajmëruar rikthimin.
“Disa histori i kam jetuar. Disa të tjera i kam dëgjuar të tregohen për mua. Do shihemi së shpejti. Ka kaq shumë për të thënë”, është mesazhi i tij.
Zyrtarisht bëhet fjalë për një prodhim multimedial në bashkëpunim me median e tij “Zëri”, ku Tahiri pritet të rrëfejë versionin e tij për vitet më të trazuara të karrierës politike. Por momenti kur ai vendos të flasë e bën historinë shumë më interesante se një dokumentar.
Sepse Tahiri nuk po rikthehet në një PS të qetë.
Erion Veliaj ndodhet në burg dhe raportet e forcave brenda socialistëve kanë ndryshuar. Belinda Balluku, një prej figurave me të cilat është përfolur së fundmi një afrim i Tahirit, vazhdon betejën e saj me SPAK-un. Ndërkohë, prej muajsh qarkullojnë informacione për vizita të ish-ministrit në selinë rozë dhe madje për një zyrë që i është vënë në dispozicion aty, ndonëse këto të dhëna nuk janë konfirmuar publikisht.
Kjo e bën rikthimin e Tahirit politikisht interesant.
Për vite me radhë, Tahiri dhe Veliaj përfaqësuan dy prej figurave më të forta të brezit të ri socialist të ardhur në pushtet me Edi Ramën. Karrierat e tyre morën më pas drejtime krejt të ndryshme: Tahiri doli nga politika dhe përfundoi përballë drejtësisë, ndërsa Veliaj ndërtoi pushtetin e tij në Tiranë dhe brenda PS-së.
Sot skena është përmbysur. Veliaj është jashtë lojës politike aktive, ndërsa Tahiri po del nga heshtja.
Dhe pikërisht këtu fjalia “ka kaq shumë për të thënë” merr një kuptim tjetër.
Çfarë do të tregojë Saimir Tahiri? Vetëm historinë e tij me drejtësinë dhe largimin nga qeveria? Marrëdhënien me Edi Ramën? Apo edhe historitë e pathëna të betejave brenda Partisë Socialiste?
Ende nuk dihet.
Por një gjë është e qartë: rikthimi i Tahirit nuk po ndodh në boshllëk. Ai vjen në një moment kur brenda PS-së po riformatohen raportet e forcës dhe kur mungesa politike e Erion Veliajt ka lënë një hapësirë që shumëkush kërkon ta zërë.
Nëse Tahiri po kthehet vetëm për të treguar historinë e tij apo për t’u bërë përsëri pjesë e historisë së PS-së, kjo mbetet për t’u parë.
Por paralajmërimi i tij është zgjedhur mirë:
“Do shihemi së shpejti.”
