Një nga surprizat e zgjedhjeve të 11 majit në Tiranë ishte numri i lartë i votave preferenciale për ministrin e Ekonomisë, Kulturës dhe Inovacionit, Blendi Gonxhja, i cili deri më tani ka grumbulluar 5475 vota.
Ky rezultat konsiderohet i papritur, sidomos në krahasim me figura më të njohura dhe me një histori më të gjatë në Partinë Socialiste, si Fatmir Xhafaj 2240 vota dhe Erion Braçe 1395 vota. Gonxhja nuk ka qenë një emër shumë i zëshëm në politikën aktive dhe nuk ka mbajtur poste të larta në qeveri deri kur, një vit më parë, u emërua ministër, pas një periudhe në krye të Drejtorisë së Përgjithshme të Shërbimeve të Transportit Rrugor.
Megjithatë, ai njihet si një nga bashkëpunëtorët më besnik të kryeministrit. Që nga koha kur Rama ishte ministër i Kulturës në vitin 1998, Gonxhja shërbeu si Shef i Kabinetit të Ministrisë së Kulturës, Rinisë dhe Sporteve. Më vonë, në kohën kur Rama drejtonte Bashkinë e Tiranës, Gonxhja u emërua nënkryetar. Pas një pauze të gjatë në politikë, ai u rikthye në skenën publike pas vitit 2013, kur Rama mori mandatin e parë si kryeministër.
Por pyetja që lind natyrshëm është: A i ka frymëzuar vërtet Gonxhja socialistët të votojnë për të, apo ky është një sinjal për postin tjetër që do t’i japë Rama, veçanërisht tani që Tirana ka mbetur pa një figurë të spikatur pas arrestimit të Erion Veliajt?
