Bashkimi Evropian ka reaguar pas zgjedhjeve parlamentare të mbajtura të dielën në Shqipëri, duke përgëzuar qytetarët për ushtrimin e së drejtës së votës dhe autoritetet për administrimin e qetë të procesit. Në deklaratën zyrtare, BE vlerëson gjithashtu futjen për herë të parë të votimit jashtë vendit si një hap pozitiv.
Duke iu referuar gjetjeve paraprake të Misionit të Vëzhgimit të OSBE/ODIHR, deklarata nënvizon se dita e zgjedhjeve ishte përgjithësisht e organizuar mirë dhe transparente, edhe pse u evidentuan disa mangësi.
“Zgjedhjet ishin në përgjithësi konkurruese dhe të zhvilluara në mënyrë profesionale, me kandidatë që patën mundësi të bënin fushatë, megjithëse disa raportuan kërcënime,” thuhet në deklaratë. Megjithatë, BE thekson se procesi u zhvillua në një mjedis shumë të polarizuar dhe me kushte të pabarabarta për garuesit, ku përdorimi i burimeve administrative dhe ndikimi institucional mund të kenë favorizuar mazhorancën.
Një shqetësim i veçantë lidhet me akuzat për presion ndaj votuesve, veçanërisht punonjësve publikë. Bashkimi Evropian përshëndet përpjekjet e autoriteteve për hetimin dhe ndjekjen penale të krimeve zgjedhore, duke e cilësuar si hap pozitiv, por thekson se ndjekja konkrete e tyre është thelbësore për të adresuar problematikat e vazhdueshme.
Në deklaratë ngrihet gjithashtu shqetësimi për mungesën e transparencës në financimin e fushatës, si dhe për pavarësinë e medias, e cila vijon të jetë e kufizuar dhe e përqendruar kryesisht te partitë kryesore.
BE bën të ditur se do të ndjekë nga afër procesin deri në certifikimin përfundimtar të rezultateve, ndërsa u bën thirrje të gjitha forcave politike të sigurojnë funksionimin normal të institucioneve.
“Ne inkurajojmë Shqipërinë të vijojë reformat e nevojshme për anëtarësimin në BE, përfshirë miratimin e një reforme të mëtejshme zgjedhore që adreson rekomandimet e ODIHR-it,” përfundon deklarata, duke shtuar se procesi i integrimit evropian është një projekt kombëtar i mbështetur nga qytetarët shqiptarë dhe që kërkon dialog të hapur dhe gjithëpërfshirës mes forcave politike dhe të gjithë shoqërisë.
