Një tjetër përplasje publike ka shpërthyer mes Princit Harry dhe Pallatit Buckingham, këtë herë për akomodimin e tij gjatë vizitës në Britaninë e Madhe.
Buckingham Palace deklaroi se Duka i Sussex-it nuk do të qëndrojë në pallat, duke kundërshtuar publikisht njoftimin e ekipit të Harry-t se ai kishte pranuar ftesën për t’u akomoduar në një rezidencë mbretërore.
Sipas burimeve pranë familjes mbretërore, Harry nuk iu përgjigj brenda afatit ofertës për akomodim dhe më pas e refuzoi zyrtarisht. Vetëm më vonë ai ndryshoi qëndrim dhe pranoi ftesën, por, sipas Pallatit Buckingham, deri atëherë ishte tepër vonë për të organizuar qëndrimin dhe stafin.
Nga ana tjetër, zëdhënësi i Princit Harry pretendon se oferta ishte pranuar dhe se Pallati Buckingham e tërhoqi atë në momentin e fundit, një vendim që e cilësoi “zhgënjyes”.
Mosmarrëveshja ka shtuar edhe më shumë tensionet mes Harry-t dhe familjes mbretërore, në një javë kur ai ndodhet në Britani për aktivitete bamirësie dhe për të pritur vendimin e gjykatës në padinë e tij kundër botuesit të Daily Mail.
Vizita zhvillohet pa Meghan Markle dhe dy fëmijët e tyre, Archie dhe Lilibet, të cilët nuk udhëtuan drejt Londrës për shkak të mosmarrëveshjeve mbi masat e sigurisë. Nuk dihet ende nëse ata do t’i bashkohen Harry-t më vonë gjatë javës në Birmingham, ku do të promovohen Invictus Games 2027.
Përplasja e fundit ka shtuar dyshimet edhe për një takim të mundshëm mes Princit Harry dhe Mbretit Charles, ndërsa burime pranë pallatit pranojnë se mungesa e besimit dhe komunikimit mes dy palëve mbetet e thellë.
