Lionel Messi ka realizuar qindra gola gjatë karrierës së tij, por pothuajse pas secilit prej tyre ai përsërit të njëjtin gjest: Ngre të dy gishtat tregues drejt qiellit.
Edhe në Kupën e Botës 2026, kapiteni i Argjentinës e bëri këtë festim pas het-trikut ndaj Algjerisë, dygolëshit kundër Austrisë dhe golit të shënuar ndaj Jordanisë. Për shumicën e tifozëve është një festim i zakonshëm, por pas tij fshihet një histori shumë prekëse.
Çdo gol dhe çdo sukses, Messi ia dedikon gjyshes së tij, Celia Olivera Cuccittini, personit që besoi i pari tek ai dhe që i hapi rrugën drejt futbollit.
Gjithçka nisi në vitin 1992, kur Messi ishte vetëm pesë vjeç. Ai kishte shkuar me gjyshen për të ndjekur ndeshjen e vëllait të tij te skuadra Grandoli. Trajneri kishte nevojë për një lojtar tjetër për të plotësuar ekipin dhe Celia i kërkoi me këmbëngulje ta aktivizonte Leon.
Në fillim trajneri refuzoi, duke menduar se djali ishte shumë i vogël dhe mund të lëndohej. Por gjyshja nuk u dorëzua.
"Fute të luajë," i tha ajo.
Më në fund trajneri pranoi. Messi u fut në lojë dhe mahniti të gjithë. Në debutim shënoi dy gola dhe që nga ajo ditë nuk mungoi më në asnjë ndeshje të Grandolit.
Vetë Messi e ka kujtuar shpesh atë moment.
"Kur dola në fushë dhe tregova çfarë mund të bëja, gjyshja iu drejtua trajnerit dhe i tha: 'Blijini këpucë futbolli. Javën tjetër do ta sjell në stërvitje.' Kështu filloi gjithçka."
Celia ishte mbështetësja e tij më e madhe. Ajo e shoqëronte në çdo stërvitje dhe ndeshje, ndërsa nga tribuna nuk pushonte së bërtituri:
"Jepjani topin Leos! Pasojani të voglit, ai do të shënojë!"
Por pak vite më vonë ajo u diagnostikua me Alzheimer. Në maj të vitit 1998, pak para se Messi të mbushte 11 vjeç, Celia ndërroi jetë në moshën 67-vjeçare.
Humbja e saj e preku thellë yllin argjentinas, i cili vendosi ta mbajë gjithmonë pranë në mënyrën e tij.
Që prej fillimit të karrierës profesionale, Messi pothuajse çdo gol e feston duke ngritur gishtat drejt qiellit, një dedikim për gjyshen që besoi tek ai kur askush tjetër nuk e shihte si një futbollist të madh.
"Ia dedikoj asaj të gjithë golat dhe fitoret e mia. Ajo ishte personi që më futi në futboll, por nuk arriti kurrë të shihte se deri ku mbërrita. Do të doja shumë të ishte gjallë për të parë gjithçka që kam arritur."
Dy vite pas vdekjes së Celias, Messi firmosi kontratën e famshme me Barcelonën mbi një pecetë letre. Më pas erdhën tetë Topat e Artë, triumfet në Ligën e Kampionëve, titujt me Argjentinën dhe kurorëzimi si kampion bote.
Megjithatë, për Messin, çdo gol dhe çdo trofe vazhdon t'i kushtohet një personi: Gjyshes së tij Celia, gruas pa të cilën bota mund të mos kishte njohur kurrë një nga futbollistët më të mëdhenj të historisë.
