Organizata Botërore e Shëndetësisë (OBSH) ka paralajmëruar se Evropa mund të përballet me javë edhe më vdekjeprurëse, pasi një valë e re e fortë e të nxehtit po afrohet nga Atlantiku.
Sipas parashikimeve, temperaturat në Portugali dhe në jug të Spanjës pritet të arrijnë deri në 43 gradë Celsius gjatë ditëve në vijim.
Drejtori Rajonal i OBSH-së për Evropën, Hans Kluge, zhvilloi një takim urgjent me përfaqësues nga 41 vende të rajonit, Komisionin Evropian dhe organizata të shoqërisë civile për të diskutuar pasojat e valës së fundit të të nxehtit dhe masat për përballimin e asaj që pritet të vijë.
Kluge theksoi se vendet që kishin hartuar plane konkrete veprimi reaguan më shpejt dhe arritën të mbronin më mirë popullsinë gjatë valës së nxehtësisë në fund të qershorit. Megjithatë, ai nënvizoi se më pak se gjysma e shteteve anëtare të OBSH-së në Evropë kanë aktualisht një plan të tillë.
Sipas ekspertëve, vala e të nxehtit që goditi kontinentin nga 20 deri më 28 qershor ishte më e rënda e regjistruar ndonjëherë në Evropë. Temperaturat ekstreme shkaktuan ndërprerje në prodhimin e energjisë, dëmtime në infrastrukturë dhe mbingarkesë të sistemeve shëndetësore.
Shkencëtarët vlerësojnë se kjo valë e pazakontë e të nxehtit lidhet drejtpërdrejt me ndryshimet klimatike.
Vetëm në Francë, Holandë dhe Belgjikë janë regjistruar rreth 3.700 vdekje shtesë gjatë kësaj periudhe, ndërsa autoritetet paralajmërojnë se bilanci mund të rritet pasi të dhënat janë ende paraprake.
Gjatë valës së fundit, në disa zona të Evropës temperaturat kapën dhe tejkaluan 40 gradë Celsius.
