Presidenti amerikan Donald Trump ka pranuar se ka telefonuar personalisht presidentin e FIFA-s, Gianni Infantino, për t’i kërkuar rishikimin e kartonit të kuq të sulmuesit të Shteteve të Bashkuara, Folarin Balogun. Megjithatë, ai mohoi të ketë ushtruar presion mbi FIFA-n, duke theksuar se kërkesa e tij ishte vetëm për një rivlerësim të vendimit.
“Gjithçka që bëra ishte të kërkoja një rishikim. Nuk i thashë: ‘Duhet ta bësh këtë’”, deklaroi Trump nga Zyra Ovale. Sipas tij, ndërhyrja e Balogun nuk përbënte faull, por ishte thjesht një përplasje aksidentale mes dy futbollistëve që vraponin me shpejtësi të plotë.
Deklaratat e Trump vijnë një ditë pasi FIFA vendosi të pezullojë zbatimin e dënimit me një ndeshje për Balogun, duke i hapur rrugë aktivizimit të tij në sfidën e 1/8-ve të Kupës së Botës kundër Belgjikës. Vendimi, i marrë nga komiteti disiplinor i FIFA-s në bazë të nenit 27 të Kodit Disiplinor, ka shkaktuar reagime të forta në botën e futbollit.
Trump tha se nuk mund t’i diktonte FIFA-s se çfarë vendimi të merrte, por shtoi se komisioni i pavarur “mori vendimin e duhur”. Ai kritikoi gjithashtu arbitrin që ndëshkoi Balogun me karton të kuq, duke e cilësuar vendimin si të gabuar dhe duke hedhur dyshime mbi paanshmërinë e tij.
Ndërkohë, vendimi i FIFA-s ka nxitur reagime të ashpra nga UEFA dhe Federata Mbretërore Belge e Futbollit, të cilat e kanë cilësuar pezullimin e dënimit si një precedent të papranueshëm që rrezikon integritetin e garës. Federata belge ka paraqitur apel kundër vendimit, ndërsa UEFA ka deklaruar se FIFA ka “kaluar vijën e kuqe”.
