Një grabitje spektakolare ka tronditur Francën, ku hajdutët kanë vjedhur bizhuteri me vlerë disa milionë euro nga muzeu i prodhuesit të njohur francez të qelqit luksoz, Lalique.
Sipas autoriteteve, autorët hynë me forcë në muzeun në Ëingen-sur-Moder, në verilindje të Francës, dhe shkuan direkt në sallën ku ruheshin bizhuteritë. Nga aty u vodhën rreth 20 bizhuteri, ndërsa dëmi paraprak vlerësohet deri në katër milionë euro.
Muzeu ka njoftuar se do të qëndrojë i mbyllur për disa ditë, ndërsa vijojnë hetimet.
Sipas hetuesve, alarmi i sigurisë u aktivizua, por kur kompania private e sigurisë përfundoi kontrollin fillestar, ishte një punonjëse e pastrimit ajo që mbërriti e para në vendngjarje dhe njoftoi policinë.
Autoritetet po analizojnë pamjet e kamerave të sigurisë për të identifikuar autorët e grabitjes.
Muzeu, i hapur në vitin 2011 pranë fabrikës së kompanisë, i kushtohet argjendarit dhe mjeshtrit të qelqit Rene Lalique, një prej emrave më të njohur të stilit Art Nouveau dhe Art Deco.
Kjo është grabitja e dytë e madhe që godet muzetë francezë brenda një viti. Në tetor të vitit të kaluar, hajdutët vodhën bizhuteri me vlerë rreth 102 milionë dollarë nga Muzeu i Luvrit në Paris, në një operacion që zgjati më pak se tetë minuta.
